Xixón presenta'l Premiu de Novela Curtia Andrés Solar

Manuel Vallina, conceyal de cultura de Xixón, y María Xosé Rodríguez, responsable de la Oficina de Normalización Llingüística de Xixón, xunto Lali Solar y Jesús Rodríguez, hermana y cuñáu d'Andrés Solar Santurio, presentaron na mañana d'esti sábadu la convocatoria de la primer edición del Premiu de Novela Curtia Andrés Solar Santurio.

Con esti premiu, la Conceyalía de Cultura quier "promover la creación lliteraria n'asturianu y al tiempu facer alcondanza de la figura del escritor xixonés Andrés Solar y lo so querencia pola llingua de nueso y la so normalización social".

 Van poder presentase obres con una estensión entre 90 150 páxines hasta'l 26 de setiembre de 2021 dende la publicación de les bases nel BOPA. La cuantía del premiu ye de 3.000€.

Andrés Solar Santurio

Nació nel Fondón de Deva, en Xixón nel añu 1955 y morrió en 1984 nun accidente de tráficu. En 1978 entra en Conceyu Bable y empieza a publicar artículos na sección qu’esta asociación caltenía nel diariu El Comercio, Alitar Asturies. En 1979 y 1980 algama’l Premiu de Cuentos Curtios del Institutu Jerónimo González de Sama, Llangréu. Van ser los empiezos d’un curtia, pero intensa carrera, enllena de premios lliterarios: II Concursu de Narraciones Curties de la Diputación, Concursu de Cuentos Curtios de Conceyu Bable en 1983, y el Primer Concursu de Cuentos Conceyu de Llanera, col relatu "En cuartu de siempre", ente otros.

En 1981 la comisión empobinadora de l’Academia de la Llingua escuéyelu como Miembru Correspondiente. Dos años depués, Andres Solar refuga la propuesta de que lu nomen académicu de Númberu, alegando tar “pocu estudiáu” pal desempeñu del cargu.

Consideráu ún de los meyores escritores del Surdimientu. Dientro de la obra lliteraria alcontramaos cuentos, poemes, novela curtia y ensayos. Dellos de los poemes foron musícaos por grupos como Dixebra o Skama la Rede.