Xixón prepárase pa la tercer “marcha verde”

Quince asociaciones de vecinos de les parroquies de Xixón decidieron ayeri convocar movilizaciones énte la falta de rempuesta a les más de 3.000 alegaaciones que se presentaren al Plan Xeneral d'Ordenación Urbana del conceyu, un plan que prevé trespasar la llende de la Ronda Sur, carretera de circunvalación de la ciudá que yera nel Plan Xeneral vixente hasta agora, la raya de la que nun podía pasar la edificación urbana, y que prevé tamién un aumentu de la edificación nes parroquies rurales xunta grandes unidaes d'espropiación y d'actuación pa lliberar terrén pa la edificación.

Los que s'enfoten en facer otra marcha verde son dalgo más de la metada de les 25 asociaciones enxertes na Federación d'asociaciones vecinales "Les Caseríes" pero nun tienen decidío si va tratase d'una manifestación o d'una concentración na Plaza Mayor. Les asociaciones que de momentu nun tan por convocar nengún actu de protesta ye porque quieren consultalo primero colos sos asociaos, pa lo que piden una selmana de plazu.

Les parroquies de Xixón convocaron hasta agora dos grandes manifestaciones de protesta contra'l Plan d'Ordenación Urbanística del Conceyu, protestes que recibieron el nome de "marches verdes". La primera "marcha verde" celebróse en febreru del 2004 y llevó a la cai a más de 6.000 persones. La segunda, dos meses dempués, movilizó a más de 10.000 persones que tomaron el centru de Xixón.