Xixón estrena un concursu novedosu pa fomentar l’emplegu del asturianu sobre cualquier temática

‘Xixón Fala en 3’ ye’l nome del concursu de creación nueva de la Oficina de Normalización Llingüística de Xixón que busca fomentar l’emplegu del asturianu sobre cualquier temática. El primer premiu nes dos estayes nes que se divide ye de 900 euros.

La competición consiste na presentación, n’asturianu dafechu, d’un tema, idea, investigación, proyeutu o problema social “con munchu procuru y cola mayor calidá llingüística posible énte un públicu non especializao, xeneralista y variao”. Los temes que se van presentar divídense en dos estayes, venceyaos a la cultura y la realidá asturiana o de divulgación non venceyaos únicamente a Asturies, que s’han de tratar nun rexistru cultu.

“Esti concursu ofrez a la ciudadanía una ocasión única pa perfeicionar les sos aptitúes de comunicación n’asturianu, pa emplegar l’asturianu en cualesquier estaya y rexistru y pa participar nun eventu col que van algamase cotes altes de prestixu y normalización en tola comunidá asturfalante”, dende’l serviciu de normalización. El públicu va ser non especializao, xeneralista y variao, polo que los asistentes al mesmu “van tener una perbona manera d’abrir mires y d’averase a un conocimientu, anque seya esbozáu, de temes mui estremaos”.

L’actu públicu nel que se van facer les diferentes intervenciones, qu’han de tener un llargor de 3 minutos esautos, va ser el 15 d’avientu nel salón d’actos de la Escuela de Comerciu de Xixón a les 17.30 hores. Van poder presentase a esti concursu persones mayores d’edá con esplicaciones comunicatives curties d’estremáu calter y que respuendan al enfotu del concursu, pa lo que tienen de plazu hasta’l día 10 unviando un corréu electrónicu a llinguaasturiana@xixon.es col títulu de la intervención y un resume de la mesma.

Les recompenses previstes van ser de 900, 400 y 200 euros pa los primeros clasificaos de cada estaya. El xuráu va tar conformáu por un representate de la conceyalía d’Educación y Cultura, de l’Academia de la Llingua Asturiana, de la Conseyería d’Educación y Cultura, de la Universidá d’Uviéu, de la Oficina de Normalización Llingüística y del mundu de la comunicación.