Xixón entama unes xornaes de normalización “pa compartir esperiencies y xunir fuercies”

|
Xixón entama unes xornaes de normalización “pa compartir esperiencies y xunir fuercies”

Trece años depués, Xixón torna a entamar les Xornaes de Normalización Llingüística nos Conceyos “pa compartir esperiencies, deprender unos d’otros y xunir fuercies”, apuntó la edil Ana Montserrat López Moro. Va celebrase del 13 a 15 de payares nel Antiguu Institutu con representantes d’otros idiomes del Estáu.

En total van ser trés díes de charres y alderiques coles que la Conceyalía de Cultura y Educación pretende dar a conocer “qué ye lo que se ta faciendo en Xixón en normalización y planificación llingüística”, como señaló María Xosé Rodríguez López, responsable de la Oficina de Normalización Llingüística, y, al empar, averase a “otres realidaes que se tán dando n’otros sitios del Estáu español”. Asina, nes xornaes van participar representantes de Pontevedra (gallegu), Iruña (vascu) y Palma (balear), amás de los servicios de normalización d’Aragón y València, o coleutivos d’otres llingües, como l’Asociación Cultural Faceira (lleonés).

López Moro y Rodríguez López presentaron esta mañana la iniciativa nel Centru de Cultura Antiguu Institutu, mesmu llugar onde van desendolcase toles actividaes n’horariu de mañana y tarde. “Van poder conocese distintes esperiencies de normalización llingüística que se tán viviendo n’otros territorios, amás d’afondar la situación que se ta dando anguaño n’Asturies na puesta en marcha y mantenimientu de los distintos servicios de normalización llingüística nos conceyos”, esplicó la conceyala.

“Esperamos qu’estes xornaes puedan contribuyir a que’l trabayu de toes y toos sume a favor de les llingües, sofitándoles y faciéndoles medrar”, siguió López Moro, que va encargase d’inaugurar les mesmes el llunes 13, a les 10.15, enantes de la charra ‘La Oficina de Normalización Llingüística de Xixón: catorce años faciendo camín, pasu ente pasu, pola normalización llingüística’, a cargu de Rodríguez López. L’asistencia a les II Xornaes de Normalización Llingüística ye abierta a tola ciudadanía, con plazu p’apuntase hasta’l día 7 na sede del SNL xixonés (Xovellanos, 21), nos teléfonos 985.18.13.89 o 985.18.14.28, o nel corréu electrónicu llinguaasturiana@xixon.es. Les persones matriculaes qu'acudan a les charres y alderiques van recibir un certificáu d'asistencia.

Asturies.com, presente

El martes, a les 17 hores, Asturies.com va participar como convidáu nel alderique ‘Una ventana abierta a la normalización social del asturianu’ pa falar sobre’l papel de los medios de comunicación. Na mesma tamién van esponese esperiencies sobre lliteratura, cine, deporte, teatru, tresmisión xeneracional y reivindicación llingüística.

El programa completu de les II Xornaes de Normalización Llingüística ye’l siguiente:

Llunes 13 de payares

  • 10 hores: entrega de materiales
  • 10.15 hores: presentación de les xornaes a cargu d’Ana Montserrat López Moro, conceyala d’Educación y Cultura.
  • 10.30 hores: 'La Oficina de Normalización Llingüística de Xixón: catorce años faciendo camín, pasu ente pasu, pola normalización llingüística', a cargu María Xosé Rodríguez López, responsable de la Oficina de Normalización Llingüística de Xixón.
  • 12 hores: posa.
  • 12.30 hores: 'Una amuesa de los servicios pa la normalización de la llingua gallega: el SNL del Conceyu de Pontevedra/Unha mostra dos servizos para a normalización da lingua galega: o SNL do Concello de Pontevedra', a cargu de Concepción Cochón, responsable del SNL de Pontevedra.
  • 17 hores: 'El Modelu Burela de Planificación Llingüística. Proyeutu d’anovación del IES Perdouro/O Modelo Burela de Planificación Lingüística. Proxecto de innovación del IES Perdouro', a cargu de Bernardo Penabade, responsable del proyeutu.
  • 18 hores: 'El llionés: marxinación, desprotección ya inicitivas privadas pa la súa recuperación', a cargu de Nicanor García Álvarez, representante de l'Asociación Cultural Faceira.

Martes 14 de payares

  • 10.30 hores: 'L’eusquera nel Conceyu de Pamplona: reiniciando/Euskara Iruñeko Udalean: berrabiarazten', a cargu d'Inma Errea, xefa del serviciu d’eusquera del Ayuntamientu d'Iruña.
  • 12.00 hores: posa
  • 12.30 hores: 'Agora x l'aragonés: abriendo buelga pa normalizar la llingua más amenazada d'Europa/Agora x l'aragonés:fendo traña ta normalizar a luenga más menazata d'Europa', a cargu de Francho Beltrán, xefe de serviciu de Política Lingüística de Aragón.
  • 17 hores: 'Una ventana abierta a la normalización social del asturianu', con esperiencies d’asociaciones, entidaes y coleutivos d'Asturies.

Miércoles 15 de payares

  • 10.30 hores: 'El Serviciu d’Asesoramientu Llingüísticu del Conceyu de Palma, ente l’asesoramientu y la dinamización/El Servei d'Assessorament Lingüísticde l’Ajuntament de Palma, entre l’assessorament i la dinamització', a cargu de Miquel Vives Mascaró, responsable del Servei d'Assessorament Lingüísticde l’Ajuntament de Palma.
  • 12 hores: posa.
  • 12.30 hores: 'La Unidá de Normalización Llingüística y los conceyos, ¡Coneutaos pol valencianu!/La Unitat de Normalització Lingüística i els ajuntaments. ¡Connectats pel valencià!', a cargu d'Inmaculada Cerdà, direutora de la Unitat de Normalitzaciò Lingüística de la Diputació de València.
  • 17 hores: 'Servicios de Normalización n’Asturies, 15 años trabayando pol futuru', a cargu de Penélope Miranda,  representante de l’Asociación de Trabayadores de Normalización Llingüística.
  • 18 hores: alderique con Miranda, Xabiel García Pañeda (delegáu de Coordinación y Estratexa Universitaria de la Universidá d’Uviéu) y Fernando Padilla (direutor xeneral de Planificación Llingüística y Normalización).
  • 19.30 hores: pieslle de les xornaes.

Na semeya, Rodríguez López, López Moro y Hermina Bermúdez, xefa de división d'Educación, Universidá Popular, Proyeutos Culturales y Normalización Llingüística.

Contador Estadistiques