Xixón celebra la fiesta la sidra

La XIV edición de la Fiesta la Sidra vive esti fin de selmana los sos díes más intensos na Plaza l'Ayuntamientu de Xixón, dempués de qu'ayeri, na primera xornada, s'atacare otra vuelta'l récord mundial d'echar sidra. Mientres que la tarde del sábadu va contar cola ambientación musical del Orfeón Xixonés, que va facer un recital de cantares de chigre a partir de les nueve la nueche, el domingu, a lo llargo de la tarde, los llagares ddel país van dar a prebar de baldre la so producción, hasta un tope de cien caxes por caún de los más de 30 llagares presentes na fiesta.

Complementariamente a la fiesta, el conceyu de Xixón presentó tamién anguaño un CD colo meyor de los cantares de chigre asturianos nes voces de distintos intérpretes, ente ellos xente como'l Che de Cabaños. El discu, de tirada curtia, va tar a la venta esti fin de selmana na fiesta. Amás de l'actividá na plaza Mayor, asitiáu nos Xardinos de la Reina va haber un mercáu de la sidra y la mazana.