Xixón Baloncestu 64 - Unicaja 89

Cola derrota énte l'Unicaja y el trunfu del Lobos Cantabria, rival directu na llucha pola permanencia, al equipu de Moncho López falten-y tres partíos perdíos más pa baxar a la lliga LEB. El Xixón nun foi enemigu pal equipu andaluz, que ta lluchando na parte alta de la tabla y que tien xugadores muncho meyores que l'equipu asturianu. Bona preba d'ellos ye que mientres la estrella del Xixón, Lou Roe, tenía'l día malu, los malagueños nun tuvieron más que sacar a cancha a Frederic Weis -pretendíu pola NBA americana- p'acabar de planchar al Xixón. L'equipu de Moncho López nin siquiera-yos dio a los aficionaos un final d'infartu de los que dacuando ye quien a regalar anque seya pa perder nel postrer momentu. Con ventayes d'hasta venti puntos y col árbitrio permitiendo-yos bastante, l'Unicaja pasolo en grande nel Pabellón de La Guía, que ya arreciende a categoría inferior.