Xixón, Avilés y Uviéu rexistren un aumentu de la contaminación del aire

|
Xixón, Avilés y Uviéu rexistren un aumentu de la contaminación del aire

El Gobiernu alerta a les persones con problemes respiratorios de que’l viernes la situación de l'atmósfera va complicar una normal ventilación en Xixón, Avilés y Uviéu. L’ausencia de lluvia estos díes provoca que nestos trés conceyos aumente la contaminación por concentración de partícules en suspensión PM10.

L'Axencia Estatal de Meteoroloxía (Aemet) apurre diariamente al Executivu l'informe del analísis y predicción de condiciones de ventilación atmosférica n'Uviéu, Avilés, Xixón y les cuenques mineres. L'estudiu últimu indica que pa mañana la situación de l'atmósfera va complicar una normal ventilación en Xixón, Avilés y Uviéu, situación que se prevé que fine’l día siguiente, sábadu.

La estabilidá atmosférica que se caltién estos díes nel país motivó un aumentu de la concentración de partícules en suspensión PM10 (menores de 10 micres), qu'afecta sobre manera a delles zones de Xixón. Pal restu de los contaminantes, los valores permanecen en niveles habituales.

Esti episodiu nun tendría de suponer un riesgu para la salú. Sicasí, encamiéntase que les persones con problemes respiratorios severos tomen los cuidaos habituales y eviten prauticar actividaes nel esterior qu'impliquen esfuerciu físicu.

La monitorización de la calidá del aire pue consultase nesta web de la Conseyería d'Infraestructures, Ordenación del Territoriu y Mediu Ambiente.

Denuncies de la Coordinadora Ecoloxista

La Coordinadora Ecoloxista d'Asturies lleva alertando a lo llargo de la selmana d'esti aumentu de la contaminación del aire, con un aumentó que cifró del 450 por cientu en Xixón na madrugada del martes y "valores espectaculares de partícules y tamién d'óxidos de nitróxenu"n'Avilés na del miércoles. Por esti motivu, demandó esta mañana al Gobiernu l'activación del protocolu de la contaminación.

Na imaxe, contaminación sobre Xixón esti alborecer. Semeya de la Coordinadora Ecoloxista d'Asturies.

 

Contador Estadistiques