Xixón y Uviéu, sedes de los actos del VIII Festival de Cine Asturianu

El VIII Festival de Cine Asturianu vuelve a Asturies, con actos en Xixón y Uviéu. L’Antiguu Institutu acueye dos actividaes esti martes, mentes que’l miércoles va celebrase la Gala d’Entrega de Premios nel uviedín Teatru Filarmónica.

A les 17 hores, nel centru cultural xixonés, va tener llugar la presentación del llibru ‘Vivir el cine. 120 películas que no podrás olvidar’, de Miguel Losada, volume nel que 60 autores de la trayeutoria de Luis Alberto de Cuenca, José Luis García Sánchez, José Luis Berlanga, Elsa López, Enrique Gracia o J.L. Castro de Paz, aporten la so visión sobre’l sétimu arte y resalten aquellos filmes que más recuerden. Amás, la espublización recueye semeyes y una coleición destacada de cartelos de películes.

Darréu, a les 18 hores, va tener llugar la proyeición de los trabayos nominaos al Premiu al Meyor Curtiumetraxe y la presentación de los sos creadores. Asina, van poder vese les cintes ‘Évora’, de Mark Ostrowski; ‘Keres’, de Alfonso S. Suárez; ‘Le futur’, de Benjamín Villaverde; ‘Nunca’, de Javier y Kiko Prada; ‘La mujer del hatillo gris’, de Luis Trapiello; ‘Mamá’, de Javier y Kiko Prada; ‘La mirada circular’, d’Iván Sainz, Dirk Soldner y Jaime Fernández; ‘A dextrorsum’, de Valentín Martínez; ‘Lo estipulado’, de Javier y Kiko Prada; ‘Módulo 10’, d’Ángeles Cachón y Teresa Marcos; y ‘Machine wars’, de Juan Caunedo.

El día grande d’esti festival va tener llugar mañana, a les 20 hores nel uviedín Teatru Filarmónica, cola celebración de la Gala d’Entrega de Premios, actu que va incluyir un homenaxe al actor Frank Braña, fináu en febreru del 2012. Amás de la categoría al Premiu al Meyor Curtiometraxe, tamién van entregase gallardones nes siguientes estayes: Meyor Actor (Javier Almeda, Fernando Amado, David Cabal, Daniel Cabrero, René de la Cruz, Ricardo Jordán y Eduardo Santos),  Meyor Actriz (María Botto, Macarena Gómez y Olga Montero), Meyor Documental (‘Eu soi quen fun’, ‘Concejo de Laviana. La Laviana que sueña, la Laviana que sueñas’ y ‘Sobra’) y Meyor Película (‘Un contrato extraño’, ‘Hasta el fin del día’ y ‘El sueño de Luis Moya’). El Premiu d’Honor d’esta edición ye pa Frank Braña.

Na gala ta prevista la participación de Pepa Martínez, el Grupín de Teatru SomosAsturies, Elena Martín, Miguel Losada, DiCarlo, Isabel Friera, Adrián Zamanillo, Ángela Fernández del Rey, Moisés Tuñón, Saúl Quiñones, Manuel Curiel y Xavi Vilareyo. Tres esti eventu, la Sala Le Comedie va acoyer una ‘Fiesta del Cine’.