Xixón va vender una casa mariñana de Piñole pa mercar obres del pintor

El Conceyu de Xixón va entamar una puya d’una casa mariñana y una panera de Cabueñes que pertenecieron a Nicanor Piñole. L’oxetivu d'esta operación ye ampliar la coleición municipal d’obres del pintor xixonés coles perres que se ganen na puya.
 
La parcela qu'inclúi l'inmueble –donada pol pintor al Conceyu– ta tasada de primeres en más de 600.000 euros, anque va ser la corporación próxima la que tenga de siguir los trámites, según decidió güei la comisión que vela polos intereses del legáu del pintor xixonés a Xixón. Justo Vilabrille, conceyal d’Educación y Cultura, esplicó que de primeres, el legáu taba condicionáu a tornar l'inmueble en casa-muséu de Nicanor Piñole. Sicasí, precisó que tolos informes refuguen esa idea, dao que ye “mui difícil facela visitable”.
 
Según señaló, trátase d'una casa mariñana con unes carauterístiques bien determinaes, polo que ye “prácticamente imposible facela visitable a neños o persones mayores”, a lo qu’hai que sumar que la carretera ye estrecha, lo qu'enzancaría l'aparcamientu d'autobuses. Por too ello, mientres la xunta de la comisión, l'alcaldesa de Xixón, Paz Fernández Felgueroso, treslladó a los miembros d’ésta que tovía esiste una obra estensa del pintor y que de vez en cuando ponse a la venta parte d’ésta, polo que propunxo poner a la venta la casa p'arriquecer la coleición Piñole.
 
Los descendientes d’Enriqueta Ceñal –viuda del artista, yá finada– y los miembros de la comisión aceptaron la propuesta municipal que va tener que ser confirmada pol equipu de gobiernu nuevu. La casa mariñana que va vender el Conceyu de Xixón lleva’l nome de ‘El Llosu’ y ta asitiada en Cabueñes. En total, la parcela tien una superficie de 3.570 metros cuadraos, de los que 255 tán construyíos.