Xixón va llantar 27 hectárees de viesca del país

El Conceyu de Xixón va llantar a lo llargo d'esti añu 2006 cerca de 10.000 árboles autóctonos pa repoblar con ellos un total de 27 hectárees nel Monte Deva, onde nel 2005 yá se punxeron otros 8.000 árboles pa la parte del Cantu Coroniella dientro d'esta mesma fastera y onde se llimpió tamién l'añu pasáu'l rozu que tomaba otres 50 hectárees que taben echaes a monte. Fayes, bedures, ablanales y pláganu son les especies con que va recuperase esti pulmón verde pa la ciudá.El presupuestu pa esti llabor ye de 122.000 euros, anque'l plan ta entovía pendiente de que'l Gobiernu asturianu-y dea de pasu la Declaración d'Impactu Ambiental.

L'actuación enxértase dientro d'un programa que se llama oficialmente "Arcu Mediuambiental del Conceyu de Xixón" un proyectu qu'echó a andar yá nel añu 1988, cuando'l conceyu vio les posibilidaes mediuambientales qu'ufiertaba'l Monte Deva. Amás de la repoblación con árboles qu'entamó nel añu 1990, el plan tamién llevó arreyada la realización d'escavaciones arqueolóxiques que recuperaron una necrópolis neolítica, amás de la recuperación d'una antigua casería abandonada pa convertila en sede d'un centru de trabayu coles abeyes y el miel, centru d'interpretación de la naturaleza y un observatoriu astronómicu.