Xixón torna a disfrutar en Selmana Santa de la Primer Sidre l’Añu

El Muséu del Pueblu d’Asturies va acoyer dende esti xueves el certame Primer Sidre l’Añu, que vive la so tercer edición. A lo llargo de cuatro díes, tolos visitantes van poder prebar la primer producción de la collecha 2011 de cerca de 80 llagares.

Pa ello namái ye necesario pagar 5 euros na puerta –la entrada al recintu museísticu xixonés ye de baldre– y tener un vasu de sidra, que tamién pue mercase nel llugar por 2,50 euros. Una vegada dientro, nel tendayu, va tar instalada la barra na que los asistentes van poder solicitar a los echadores la sidra del llagar que quieran prebar ente l’ampliu catálogu de participantes, onde tán incluyíos la práutica totalidá de los productores asturianos activos anguaño. Como novedá, nesta ocasión tamién va haber representación internacional cola presencia de seis llagares alemanes, ún checu y otra castellanu, el que fai la sidra espumosa El Pomar de Gredos.
 
Al igual que n’ediciones anteriores, el Primer Sidre l’Añu-III Certame Agroalimentariu Nacional, que va abrir les sos puertes de 12 a 22 hores de xueves a sábadu, y de 12 a 19 hores el domingu, tamién va vivir una gran cantidá d’actividaes paraleles venceyaes a la cultura asturiana, ente les que destaca la III Asturianada y Sidre que coordina Xosé María García Sánchez ‘Llábana’, que na presentación del eventu celebráu güei na Casa Conceyu de Xixón destacó que “l’asturianada tien que tar presente con el sidre, y tar presente n’Asturies en tolos llaos, porque ye una manifestación cultural nuesa perimportante”. L’Asturiana y Sidre va celebrase de sábadu, a partir de les 13 hores, cola actuación de la Bandina l'Andecha Turcipié pa, sobre les 16 hores, entamar una amuesa d’asturianada con cantares venceyaos a la cultura sidrera na que destaca la presencia de dellos escolinos d’Ismael Tomás en La Quintana.
 
Tasties guiaes, exhibiciones de tonelería, campeonatos de llave y rana, un mercadín, la esposición del concursu de semeyes de La Sidra y les actuaciones de la Bandina La Sidra, la Bandina l'Andecha Turcipié, la Escuela Música La Quintana, la Banda Gaites Villa de Xixón, la Banda Gaites Noega, El Garrapiellu y Andecha de Baille La Deva son dalgunes de les munches otres actividaes programaes pa estos cuatro díes. La mayor novedá con respeuto a otros años ye la celebración del primer concursu de sidra fecho en casa, patrocináu pola Tonelería Hermanos Argüelles, que tien como requisitu que la sidra casera s’ellabore nun tonel de madera.
 
L’oxetivu de recuperar les espiches de Selmana Santa
 
Na presentación del Primer Sidre l’Añu tamién tuvieron presentes Llucía Fernández Marqués, en representación de la Fundación Asturies XXI y la revista La Sidra, organizadores del certame, y Carlos Rubiera, conceyal d’Educación, Cultural, Mocedá y Festexos del Conceyu de Xixón. Fernández Marqués destacó l’esfuerzu que supón mantener esti eventu nel calendariu pese a la crisis y quixo agradecer l’apoyu del “Ayuntamientu de Xixón, que ta equí sofitándonos y echando una manina na organización; a los llagareros, que nun sólo siguen faciendo sidre, sinón que continúen collaborando con nosotros; y a xente como Llábana, que sigue tirando pola cultura y la música del país”. Darréu, recordó que la Primer Sidre l’Añu busca “recuperar la tradición, el ritual, de, cola llegada de la primavera, abrir les pipes pa dir prebando la sidra y compartir con collacios y conocíos la sidra qu’acaben de sacar”. D’igual forma, el certame tamién va dar protagonismu a otros tipos de sidra, como la brut, la de xelu o la d’espresión nueva.
 
Rubiera, na so intervención, destacó que’l “Ayuntanientu de Xixón y l’actual equipu de gobiernu tenemos mui claro que la sidra ye un sector fundamental p’Asturies por dos razones. En primer llugar, porque ye un elementu simbólicu de la identidá asturiana, nel qu’amás los asturianos nos reconocemos de forma total, y como tal elementu simbólicu, ye mui importante que les instituciones lu apoyen. Per otru llau, la sidra ye un sector económicu de gran importancia na actualidá, que sigue teniendo un potencial d’espansión nel restu d’España, d’Europa y del Mundu, y que nos años últimos yá vien siendo puesto en valor polos propios industriales”. “Nel futuru, sobre manera si somos capaces de tener polítiques afayadices de repoblación de pumaraes, será un sector capaz de xenerar emplegu y riqueza pa la comunidá”, concluyó.
 
Na semeya, Carlos Rubiera, Llábana, Llucía Fernández Marqués, Xosé Nel Riesgo y Arsenio Angones.