Xixón súmase al Pautu de los Alcaldes pa reducir la contaminación

Carmen Moriyón anunció’l miércoles que va sumase al Pautu de los Alcaldes pa reducir les emisiones de CO2 nun 20 por cientu enantes del 2020. La Coordinadora Ecoloxista d’Asturies cree que’l primer pasu ha de ser refugar la incineradora.
 
Esti pautu d’alcaldes, de carauter européu, tuvo’l so orixe nel añu 2008 na Comisión Europea col oxetivu de meyorar la eficiencia enerxética y l’usu d’enerxíes renovables nel ámbitu llocal. Dende entós, 2.300 municipios de tola Xunión Europea (UE) sumáronse a esti pautu al qu’agora incorpórase Xixón. Nel mes de setiembre, cuando ta previsto que’l Conceyu presente’l so plan de tresporte y movilidá, y aforru enerxéticu nos edificios públicos, va ser cuando va formalizase la entrada de la ciudá nesti pautu.
 
La Coordinadora Ecoloxista d’Asturies mostró güei la so satisfaición pola anuncia fecha ayeri por Moriyón, pero reclamó que la incorporación de Xixón al pautu “nun se quede en bones intenciones” y que se dean “pasos decididos”. “La meyor midida qu’esperemos qu’anuncie el Consistoriu nuevu ye l’abandonu del peligrosu proyeuto de la incineradora prevista nel conceyu, que sería una productora grande de dióxidu de carbonu” nun territoriu que tien “el mayor nivel de CO2 por habitante d’Europa”, señalen dende la Coordinadora. Amás, los ecoloxistes recuerden qu’esta instalación produciría otros contaminantes peligrosos.