Xixón declara a la sidra "bébora institucional" del conceyu

El Plenu del Conceyu de Xixón aprobó por unanimidá declarar a la sidra como "bébora institucional" del conceyu. Utilizaráse nos actos protocolarios municipales como promoción.

La propuesta presentada pola Fundación Asturies XXI salió asina alantre con un apoyu total de tolos grupos municipales. Una de les demandes vieyes d'esta institución ye l'usu de la sidra, en cualquier de les sos variedaes, nos actos oficiales de les distintes alministraciones del país en cuenta del 'vinu español' pa potenciar asina'l productu autóctono, una midida que Xixón va adaptar tres esta declaración. Otros compromisos que trai esta decisión ye la promoción y divulgación de la cultura de la sidra y la so presencia destacada nes campañes de promoción turística.

Otra manera, la declaración institucional de Xixón pasa a formar parte de la documentación que va unviase a la UNESCO na candidatura asturiana de la cultura de la sidra a Patrimoniu Inmaterial de la Humanidá.