Xixón convoca’l Premiu a la Romería más Asturiana pa promocionar les fiestes de prau nel conceyu

El Teatru Xovellanos aprobó esti martes la convocatoria del Premiu a la Romería más Asturiana col oxetivu de promocionar les fiestes de prau en Xixón. Tamién va repartir ayudes por valor de 50.000 pa la organización d’estes folixes.
 
Esti gallardón nuevu, anunciáu por Carlos Rubiera nel Plenu municipal del vienres, busca tamién que los comités de fiestes recuperen les maneres, usos y costumes que-yos dio mientres sieglos el so típicu y tradicional caráuter asturianu. Coles mesmes, l'asociación o entidá ganadora va recibir 7.500 euros pol premiu. Otra manera, van repartise ayudes pa que nun se pierden estes celebraciones, pa lo que ye necesario presentar la documentación necesaria na Casa la Palmera hasta’l 13 d’abril. Les bases pueden consultase na web del Teatru Xovellanos o na propia Casa la Palmera.
 
Na reunión de güei, el conseyu d'alministración tamién dio lluz verde a la propuesta de contratación del programador del L Festival Internacional de Cine de Xixón (FICXixón), puestu que va ostentar Jorge Iván Argiz, miembru del equipu escoyíu pol director del certame, Nachu Carballo. D’igual forma, alcordóla convocatoria de la seleición pa la participación nel programa 'Arte na Cai 2012' nos apartaos de música, circu, danza, teatru y artes plástiques. El 13 d’abril termina’l plazu pa la presentación de solicitúes.
 
La ‘Semana Negra’ podría dir a El Musel
 
El voceru del gobiernu municipal, Rafael Felgueroso, confirmó esti martes que s'ofreció a la organización de la ‘Semana Negra’ l'espaciu d'El Musel como alternativa pa celebrar l'eventu esta edición, anque la disponibilidá del llugar ta pendientes de les consultes pertinentes cola Autoridá Portuaria de Xixón. Nun primer momentu, el Conceyu quería instalar el certame nel recinto ferial Luis Adaro (FIDMA), refugando la posibilidá de tornar a L’Arbeyal como pidíen los hosteleros de La Calzada y El Natahoyo. Hai que recordar qu’El Musel foi la primer ubicación que tuvo la ‘Semana Negra’ enantes d’itinerar a lo llargo del conceyu.