Xixón convoca’l concursu musical “¡Que suene la llingua!”

La Oficina Municipal de la Llingua de Xixón vien de convocar el concursu “Que suene la llingua”. L’oxetivu ye axuntar la llingua asturiana y la música pa crear un cantar que sirva d’himnu pa los futuros Alcuentros de la Mocedá cola Llingua.

Nesti concursu convocáu pol Serviciu de Normalización Llingüística xixonés, tamién se-y quier dar puxu a los músicos mozos. D’esti mou, los sos componentes de los grupos que participen tienen que tener menos de venti años y tar empadronaos en Xixón.

Pal concursu namás que compite un cantar inéditu de les bandes, siendo necesariu que’l tema presentáu siga un modelu llingüísticu normativizáu. El plazu máximu d’entrega va ser el próximu 12 de marzu de 2011.

L’asturianu en Mercaplana
Per otru llau, la Oficina Municipal de la Llingua tamién ta presente en Mercaplana, eventu infantil y xuvenil celebráu en Xixón mientres el Nadal.  “L’asturianu tamién pinta” ye’l nome del espaciu del SNL en Mercaplana nel que va haber xuegos, actividaes y talleres onde l’asturianu ye la llingua protagonista.