Xixón allarga en dos díes la duración de la Fiesta de la Sidra Natural

Esti martes entama la XXI Fiesta de la Sidra Natural de Xixón, qu’esti añu allarga la so duración en dos díes pa sumar un total de seis. El récor d’escanciáu simultaneu mantiénse’l vienres y el día central del certame, el domingu.
 
Pese a que l’aniciu ta previstu mañana, güei va tener la primer actividá cola apertura nel patiu central del Centru de Cultura Antiguu Institutu de les esposiciones ’11 años de historia. Las etiquetas en la sidra natural de Asturias’ y ‘Les Sidrografíes’. La primera trátase d’una coleición del grupu Sidrastur con toles etiquetes sacaes pelos llagares asturianos dende l’añu 2000, cuando obligaron a etiquetar les botelles de sidra, y la segunda una serie fotográfica centrada en la bébora tradicional del país firmada por Xurde Margaride. Les dos muestres van tar abiertes al públicu hasta’l 30 d’agostu nel horariu siguiente: de llunes a vienres, de 9 a 21.30 hores; sábadu, de 10 a 14 hores y de 16 a 21 hores; y domingu, de 10 a 14 hores.
 
El ‘Día del arte urbanu y la sidra’ va servir de pistoletazu a la XXI Fiesta de la Sidra Natural. Asina, a les 18 hores va celebrase l’apertura del Mercadín de la Sidra y la Mazana nos Xardinos de la Reina, llugar onde va permanecer hasta’l domingu n’horariu de 11 a 24 hores, y, a la mesma hora, va tener una exhibición d’arte urbanu. Mentes, el miércoles, otru día novedosu na historia del certame, va entamase la xornada ‘Del llagar a la cazuela’, nome que vien de l’actividá que va desendolace nel restaurante Las Carolinas, a partir de les 20 hores, entitulada ‘I Concurso de Cocina Les Recetes de mi Güela’. Ésti ta destináu a toles persones que quieran dar a conocer les sos cualidaes culinaries, pa lo qu’han de presentar un platu fechu con sidra o mazana. Los interesaos en participar o n’algamar más información pueden facelo nes oficines del Teatru Xovellanos o nel corréu sidra@teatrojovellanos.com. Otra manera, esti miércoles, a les 17 hores, va tener llugar na Plaza Mayor el Concursu d’Escanciadores, puntuable pal Campeonatu d’Asturies d’Echadores de Sidra.
 
Los cantarinos de chigre, el sábadu
 
El xueves va ser la ‘Xornada de la sidra casera’, yá que la organización entama esti día’l I Concursu de Sidra Casera del Principáu d’Asturies, a partir de les 20.30 hores na Plaza Mayor. Enantes, na rula antigua, va haber un alcuentru d’ellaboradores de sidra (13 hores) y una actividá entitulada ‘Respuestas prácticas sobre el cultivo del manzano’ (18 hores). Amás, va principiar a furrular l’esitosu ‘Bus de la sidra’, qu’avera a la xente interesao a dellos llagares del conceyu pa conocer de primer mano’l procesu d’ellaboración de la sidra.
 
El vienres, ‘Día del escanciador’, va celebrase na sablera d’El Natahoyo un intentu nuevu de récor mundial d’escanciáu simultaneu. Pa ello, la organización va repartir ente los presentes 7.577 botelles, una más que l’añu pasáu, pa tratar de superar el récor anterior. La cita ta prevista pa les 20.30 hores, anque’l repartu de sidra va principiar a les 18.30 hores. Mentes, el sábadu, ‘Día de los cancios’, va tener llugar una de les actividaes más prestoses de la Fiesta de la Sidra Natural de Xixón. A les 21 hores, na Plaza Mayor, miles de persones van cantar en comuña nuna especie de karaoke que tien como oxetivu recuperar esos cantares habituales nos chigres del país non hai munchu tiempu y que siguen na memoria popular pese a les prohibiciones de cantar que mantienen munchos establecimientos hosteleros y conceyos.
 
La xornada cabera, y central, del certame sidreru xixones, el ‘Día de la sidra natural’, va ser otra vuelta’l domingu cola Plaza Mayor como epicentru. Al meudía va principiar l’actu nel que va entregase al llagareru José Tomás, de Sidra Tomás, el ‘Tonel d’oru’, y Julián Castañón (Sidra Castañón) y Gerardo Menéndez (Sidra Menéndez), representantes de los llagares ganadores del ‘Eloxu d’oru’ y del ‘Premiu del públicu’ del 2011, de manera respeutiva, van echar el primer culín de la fiesta. Hasta les 15 hores, tolos presentes van poder prebar de baldre la sidra de tolos llagares presentes na Fiesta de la Sidra Natural.