Xixón acueye esti sábadu los actos centrales de campaña de Bloque-UNA y d’IX-LV

Los pabellones d’El Llano-Contrueces y de Moreda son los llugares escoyíos pol Bloque por Asturies-Unidá Nacionalista Asturiana (UNA) y Izquierda Xunida-Los Verdes d’Asturies (IX-LV), de forma respeutiva, pa cellebrar esti sábadu los sos actos centrales de la campaña eleutoral. Nel casu d’IX-LV destaca la presencia de Cayo Lara, coordinador federal d’Izquierda Unida.
 
Los nacionalistes van principiar l’actu a les 18.30 hores cola presencia nel mesmu de Rafael Palacios, candidatu de la coalición a la presidencia d’Asturies; Roberto Colunga, cabezaleru de la llista a l’alcaldía de Xixón; y Yolanda Huergo, vocera de Bloque-UNA y númberu dos pela circunscripción central. L’encargáu de presentar les intervenciones va ser Daniel Fernández, voceru de Bloque-UNA en Xixón.
 
L’actu d’IX-LV en Moreda va celebrase pela mañana, a partir de les 12 hores. Nél ta prevista la participación de Cayo Laro y Jesús Iglesias, candidatu a la presidencia d’Asturies. Van acompañalos Nacho González, miembru de Los Verdes na llista de la coalición a la Xunta Xeneral; Jorge Espina, candidatu a l’alcaldía de Xixón; y Libertad González, candidata a un acta de conceyal en Xixón.