Xera prepara un conciertu cuadrafónicu na sala Sir Live d’Uviéu

|

El grupu de folk electrónicu Xera continúa col so enfotu d’ufrir al públicu esperiencies sonores diferentes. Asina, ta preparando un conciertu cuadrafónicu na sala Sir Live d’Uviéu –inaugurada’l xueves– pal vienres 4 d’abril.

Tres la perbona esperiencia del espectáculu ‘Llume’, eventu en 5.1 –modalidá de soníu 3D qu'emplega la ubicación estratéxica de dellos altavoces pa crear un efectu de envolvencia acústica real– que llevó al Niemeyer y al Campoamor, agora presenta ‘Xera 4.1’, formatu reducíu de soníu surround. “La cuadrafonía ye la primera espresión de soníu envolvente que se conoz. Nella empléguense dos fontes de soníu  independientes frontales –como'l estéreo convencional– y otres dos fontes independientes traseres al espectador”, espliquen dende Xera. D’esta forma, el grupu adapta’l so soníu envolvente a condiciones nueves que faciliten una esperiencia lo más asemeyada posible al 5.1, lo que permite treslladar esta apuesta musical a sales de conciertos.

La primer ocasión pa disfrutar de ‘Xera 4.1’ va tener llugar el 4 d’abril (21.30 hores) na uviedina sala Sir Live. Nesta cita, el públicu va poder sentir temes de los trés discos espublizaos hasta la fecha por Xera, esto ye, ‘Lliendes’, ‘Tierra’ y ‘Llume’, llevando a soníu cuadrafónicu per primer vegada cantares como ‘Dúrmite’ o ‘Lliendes’. Les entraes yá tan a la venta a un preciu de 5 euros en Alta Fidelidad y Musical Principado, n’Uviéu, y na Llibrería Paradiso, en Xixón. Tamién na rede al traviés d’EPticket. Na puerta, el día del conciertu, el so coste va xubir a los 8 euros.

Sala de conciertos nueva de capacidá alta

El llugar escoyíu por Xera pa presenta la so propuesta musical nueva ye la sala Sir Live, asitiada na cai Eugenio Tamayo, que s’estrenó ayeri con un conciertu de The Logical Dream, banda tributu a Supertramp, qu’axunto a cerca de 200 persones. Con un aforu pa mediu millar, los responsable d’esti llocal yá tienen programaos dellos conciertos pa los meses próximos, ente los que destaquen les actuaciones de Vargas Blues Band (12 d’abril), Barón Rojo (10 de mayu), Pauline en la Playa (17 de mayu) y Javier Krahe (7 de xunu), ente otros.

 

AdxuntuTamañu
Image icon Xera 4.1 nel Sir Live.jpg53.69 KB
Contador Estadistiques