Xera lleva la so propuesta musical a Extremadura y Galicia

El grupu de folk-electrónicu Xera va ser ún de les formaciones principales del XVI Folk Plasencia, que se celebra dende esti xueves al sábadu. Tres tocar el vienres n’Extremadura, los asturianos va desplazase’l sábadu a Galicia.
 
Miembros de la productora Onbligo, organizadora del festival placentín, destacaron a Xera como ún de les sorpreses posibles del certame d’esti añu por el so direutu potente y la orixinalidá de la so propuesta. Los asturianos van compartir escenariu cola gallega Mercedes Peón y los dos conciertos van poder sentise en direutu a partir de les 22 hores nel Canal Extremadura Radio xunto con entrevistes a los artistes y comentarios de persones entendíes del mundu folk. Completen el cartel d’esti festival Matamá Enseble y Acetre, el xueves; y Xícara y Ara Malikian, el sábadu.
 
Tres l’actuación del vienres, Xera va desplazase a Galicia pa participar nel XII Festival de Guísamo (Bergondo, A Coruña), onde tamién va compartir escenariu con Mercedes Peón, amás de con Alén do Mar. Les actividaes del festival van principiar a les 17 hores con xuegos pa los más pequeños, anque les actuaciones musicales tán previstes pa les 21.30 hores. Esti festival tien un gran siguimientu por parte de los coruñeses, yá que l’añu pasáu acudieron cerca de 3.000 persones. Una bona oportunidá pa los asturianos de dar a conocer la so música nel país vecín enantes de preparar el viaxe a Normaundie de la fin de selmana siguiente pa tomar parte nel festival Les Traversées de Tatihou xunto con artistes de renome como Carlos Núñez, Xarnege o The Chieftains.