Xera algama’l segundu puestu nel Liet International 2010

La música asturiana amosó otru añu más la so calidá. Xera quedaron nel segundu puestu nel Liet International 2010, festival de la canción en llingües minoritaries. La victoria foi pal grupu de les Isles Feroe Orka.

Gallegu, corsu, gaélicu, frisón, bretón… son dalgunes de les llingües que, cantaes so la música, axuntó esti añu en Bretaña el Liet International 2010, festival etiquetáu como l’Eurovisión de les llingües minoritaries.

El sábadu 27 de payares Asturies participó nesti eventu per tercer añu. Dixebra y Alfredo González fueran los representantes del país n’anteriores ediciones, mentanto qu’esti 2010 tocó-y el turnu a Xera, formación de folk electrónicu vencedora del Premiu al Meyor Cantar en Llingua Asturiana 2009.

Cola so orixinal propuesta musical qu’entemez soníos de raigañu y electrónica contemporánea, el cantar “Tierra” de Xera fízose cola segunda posición del festival. Bon resultáu esti que yá algamara “Indios” de Dixebra en 2008.

Premiu pa Isles Feroe
“Rumdardrongurin” del grupu feroés Orka foi’l cantar ganadora d’esta edición. Yera la primer vez que participada una banda d’esta comunidá llingüística, que tien 48.000 falantes en Dinamarca.

Per otru llau, el premiu del públicu lleváronselu los friulanos Resistence in Dub. Nesta categoría Xera quedaron con un 26% de los votos emitíos al traviés d’Internet.
 
La próxima edición del festival va a celebrase el 19 de payares del 2011 nel Teatru Giovanni d'Udine, n'Italia. Nella van participar los ganadores del Premiu al Meyor Cantar en Llingua Asturiana 2010, eventu organizáu pola Conseyería de Cultura.