Xentrificación resultó escoyíu neoloxismu del añu na consulta de l’ALLA

Con un 33 por cientu del total de votos, xentrificación resultó escoyíu neoloxismu del añu na novedosa consulta entamada pola Academia de la Llingua Asturiana (ALLA) ente les cinco propuestes de la Comisión Lexicográfica. Esti términu va incorporase próximamente al Diccionariu.

Procedente del términu inglés ‘gentrification’, acuñáu pola socióloga inglesa d’ascendencia alemana Ruth Glass nel 1964 pa describir el procesu de tresformación social y urbana determináu pola sustitución de les clases trabayadores por otres de la nobleza baxa o terrateniente, la ‘gentry’, nel so llibru ‘London: Aspects of Change’, xentrificación foi’l términu más votáu ente los usuarios de la rede que participaron na encuesta: “Ún per ún, munchos de los barrios de clas trabayadora ta invadiéndolos la clas media, mesmo alta que baxa. N’emprimando esti procesu de ‘xentrificación’ nun distritu, entaína hasta desapolinar a la mayoría o a tolos habitantes de clas trabayadora, camudando dafechu’l calter social del distritu”, escribía. En segundu llugar, con un 26 por cientu, quedó cambéu climáticu.

Intelixencia artificial rexistró un 24 por cientu, con xeollocalización más lloñe, con un 12 por cientu, y llimpieza étnica n’últimu puestu, con un 5 por cientu. La Comisión Lexicográfica de l’ALLA, encargada de tresnar, estudiar y validar periódicamente pallabres pa l’actualización del Diccionariu de l’Academia de la Llingua Asturiana (DALLA), principal fonte normativa de tipu léxicu de la llingua asturiana, escoyera previamente les cinco propuestes a partir del so material de trabayu d’esti 2023.