Xeira píde-y una entrevista inmediata a Areces

La organización de defensa de a fala d'entrambasauguas Xeira unvió ayeri dos cartes al Presidente del Gobiernu asturianu y la Conseyera de cultura protestando polo qu'entiende que ye una situación de desamparu énte actuaciones en materia llingüística y cultural que vienen de "sectores ayíos y institucióis externas".

La carta de la organización cívica del Eo-Navia entama esplicando que "Dende un tempo a esta parte y con muito máis rixo (…) as xentes del Occidente vémos sintindo cómo sectores ayíos y institucióis externas queren atribuirse funcióis y tomar decisióis que son responsabilidá del Goberno al que democráticamente escoyemos os asturianos" comentando darréu la so sorpresa porque "tanto a política cultural como os presupostos d'un goberno contemplen actuacióis nun territorio que nun é de sou" en referencia, anque ensin facer mención esplícita, al Plan de Normalización del Gallegu qu'aprebó la Xunta de Galicia.

Contra estes actuaciones, Xeira diz que ye "entovía más chocante" que'l Gobiernu asturianu nun tenga ente les sos prioridaes el llabor de "protexer y desarrollar el patrimonio cultural y, por tanto, de preservar a identidá del sou territorio". La organización píde-y polo tanto al Gobiernu asturianu que se marque nel asuntu y que faiga más que "salir al paso d'estos atropellos con declaracióis que sempre quedan en titulares de réplica a outros que parecen nos periódicos".

La organización que representa Xabiel G Menéndez pide-y al Gobiernu asturianu "respostas contundentes que nun se queden solo na denuncia d'estas inxerencias como un asunto de falta de cortesía" pa lo que reclama la oficialidá del asturianu y del gallego-asturianu como meyor midida que tarace los intentos que "dende fora, queren impoñer ilexítimamente a súa voluta á nosa, os sous intereses a os nosos, que son os de todos os asturianos" otra referencia tapecida que s'entesaca pol contestu de la carta que fala de la Llei de Llingües que ta llevando alantre Esquerra Republicana de Catalunya y que defende na so redacción orixinal la oficialidá del gallegu nel occidente asturianu.

Por too ello Xeira píde-yos entrevista inmediata a Vicente Álvarez Areces y a Ana Rosa Migoya, a los que la organización quier expresar los sos esmolecimientos "pra qu'as armas llegales das que pode fer uso el Goberno del Principao se poñan al servicio da defensa dos nosos deretos". De nun ser asina, Xeira anuncia que va llevar el casu al Defensor del Pueblu o presentar un conflictu de competencies nel Tribunal Constitucional.