Xeira pidé-y al BNG que dexe de lleer estudios llingüisticos “personalizaos”

Representantes del Bloque Nacionalista Galego dieron a conocer a lo llargo de los últimos díes al traviés de medios de comunicación asturianos la so voluntá de potenciar el gallegu nel occidente asturianu en cuantes firmen alcuerdu col PSOE pa facese col gobiernu na comunidá gallega. En declaraciones al diariu asturianu La Nueva España, el diputáu del BNG en Madrid Francisco Rodríguez señaló delles llinies d'actuación que cuenten con llevar alantre nesti sentíu, ente elles la xuba de les ayudes que concede'l Gobiernu gallegu a asociaciones defensores del gallegu na fastera del Navia-Eo. Pa Rodríguez "Lo que se fala nel occidente d'Asturies foi siempre gallegu", calificando la existencia de "fala" como "un inventu fechu dende ciertos ámbitos que pretende que lo que se fala nel Navia - Eo ye una varuante del asturianu". El líder del BNG, Anxo Quintana, señalaba tamién a esti mesmu diariu nuna entrevista espublizada'l llunes que lo que se fala nel Navia-Eo ye gallegu y congraciábase de la bona recepción de la señal de la televisión gallega TVG nel occidente asturianu y, fuera yá de la cuestión llingüística, afirmaba que los monarques asturianos usaben el gallegu con una clara vocación institucional, apelando a una historia "por contar y paralela a la oficial"

Énte estes declaraciones, la rempuesta dende'l movimientu de defensa de la fala eonaviega nun pue ser más contundente. Xabiel G. Menéndez, representante de l'asociación de defensa de la fala Xeira, solicitó-y a Francisco Rodriguez en declaraciones a Asturies.com, "que s'informe y que llea les resoluciones asturianes na cuestión de la fala del Eo-Navia, onde se diz claramente de que ye una llingua aparte colos mesmos derechos que l'asturianu". Xabiel G. Menéndez quitó-yos seriedá a les declaraciones de los líderes gallegos sobre la promoción del gallegu fuera de les fronteres alministratives de Galicia en cuantes que "Un partíu politicu nun tien nada que considerar fuera del su ambitu teritorial d'actuación" ello aparte de que pal representante de Xeira "nosotros los eonaviegos amañamonos solos na defensa de la nuestra fala y nun precisamos de que vengan de fuera a facenos política llingüística"

En cuantes al encontu científicu de les opiniones del BNG sobre la llingua del Navia-Eo, Xabiel instó a los líderes d'esta formación a que "dexen de lleer estudios llingüisticos personalizaos". Xabiel G.Menéndez fizo una "llamada d'atención al PSOE asturianu pa qu'intervenga lo mesmo qu'intervino nel so momentu énte actuaciones disparataes que se proponíen dende Galicia" en referencia a casos como'l del programa de vacaciones pa que los eonaviegos deprendieren gallegu en Galicia. Según el representante de Xeira, "el PSOE asturianu ha facer usu de les sos rellaciones col PSDG pa frenar estes intervenciones fuera de llugar que nun faen negún bien pa qu'Asturies y Galicia caltengan rellación de bona vecindá"