Xega da-y un lladriellu de premiu a Gustavo Bueno

Con motivu de la celebración el 28 de xunu del Día Internacional de Lesbianes, Gais, Tresexuales y Bisexuales, l'asociación Xente Gai Astur (XEGA convoca una serie d'actos de conmemoración y reivindicación dientro de la campaña que'l colectivu ta faciendo pol reconocimientu en toa Europa de los derechos de les persones homosexuales. Un actu políticu-institucional nel Antiguu Institutu Xovellanos de Xixón va abrir los actos, qu'incluyen la entrega de los Premios 28 de Xunu.

Estos premios estremen ente'l Triángulu y el Lladriellu Rosa, reconociendo'l primeru'l llabor pola igualdá y castigando'l segundu les actitúes negatives pa col colectivu. El filósofu Gustavo Bueno va ser el merecedor nesta edición del lladriellu polos sos comentarios en qu'aseguraba que'l gobiernu español merecía que lu echaren abaxo por llexislar sobre les bodes homosexuales. L'Hospital de San Agustín d'Avilés va llevar el premiu positivu pol trabayu de la so unidá de xéneru.

N'acabando l'actu institucional, los colectivos tienen prevista una manifestación dende la Plaza'l Parchís hasta'l Paséu de Begoña, onde va lleese'l manifiestu del 28 de xunu de 2007 "Agora Europa: la Igualdá ye posible".