Xega conmemora la decisión de la OMS de suprimir la homosexualidá como enfermedá mental

Esti martes, a les 20 hores, ta prevista una concentración n’Uviéu pa conmemorar la decisión de la Organización Mundial de la Salú (OMS) de retirar la homosexualidá de la llista d’enfermedaes mentales. Esti fechu tuvo llugar el 17 de mayu del 1990.
 
Xega, asociación que representa a les lesbianes, gais, transexuales y bisexuales d’Asturies, entama esta concentración per sétimu añu consecutivu pa celebrar esta decisión que supunxo “la fin de casi un siglo de homofobia médica y discriminación sistemática” a estes persones, anque ello nun fora namái un pasu más na llucha pola igualdá de derechos del coleutivu LGTB. “Hai que recordar que tovía esisten siete países nel mundu onde se condena con pena de muerte a les personas homosexuales, bisexuales y transexuales. En más de la mitad de los países la discriminación contra la comunidá LGTB ruempe tolos acuerdos internacionales y fraya de forma sistemática los Derechos Humanos, inclusive los más elementales”, denuncien dende l’asociación asturiana.
 
Por ello, les persones que conformen Xega y simpatizantes van participar nesta concentración que va tener llugar na cai Pelayo, frente al Teatru Campoamor, a partir de les 20 hores. Nesta ocasión, el coleutivu va dirixir les reivindicaciones “a la erradicación de cualisquier norma que suponga una discriminación hacia les muyeres, tea basada ésta na orientación sexual o na ausencia d’un varón na pareya”, tomando como referencia los casos de dos muyeres que vieron como la Conseyería de Salú negába-yos el tratamientu pa poder ser madres pol fechu de ser lesbianes.