Xavi Cayado gana'l IV Xosé Caveda y Nava

L'autor presentó'l testu 'A pie firme'.

El IV Premiu Relatos Curtios Xosé Caveda y Nava, qu'entrega'l Conceyu de Villaviciosa, foi pa Xavi Cayado Valdés. El xuráu, formáu polos escritores Pilar Arnaldo y Lluis Portal, y l'historiador y téunicu en normalización llingüística Rafael Rodríguez Valdés, decidióse por unanimidá pol testu del autor nacíu en Xixón nel 1987 pol tratamientu realista del tema, la construcción equilibrada del relatu y l'usu acertáu de los distintos rexistros llingüísticos.

'A pie firme' xira al rodiu la memoria histórica y los rellatos familiares recoyíos na zona oriental del conceyu de Villaviciosa, na que Cayado tien llazos familiares. Profesor de Llingua Asturiana y Lliteratura, el ganador d'esti premiu valoráu en 1.000 euros trabayara hasta'l momentu principalmente la poesía, collaborando con revistes como 'Formientu', 'A Quemarropa' o 'El Cuaderno Digita', y apaeciendo na antoloxía 'Canigú Lliterariu'.

Cayado pon asina'l so nome xunto col d'otros escritores de sonadía que llevaron el Xosé Caveda y Nava. Nel 2017 mereciólu Francisco Álvarez ‘Paco’ con ‘Mar d’Irlanda’, que repetiría l’añu pasáu con ‘El faru de Viena’, mentes que la segunda foi pa José Ángel Gayol con ‘Tolo que sé sobre toles coses’.