Xandru Fernández consigue’l so tercer Xosefa Xovellanos

La Conseyería de Cultura y Deporte dio a conocer esti vienres el ganador del XXXII Premiu Xosefa Xovellanos de novela n’asturianu. L’escritor Xandru Fernández llevóse’l gallardón per tercera vez pol trabayu 'El príncipe derviche'.
 
Esta obra trata sobre una conspiración anarquista nel Mediterraneu nel contestu del asesinatu de la emperatriz d'Austria Isabel de Wittelsbach (que morrió en Xinebra en 1898), conocida históricamente como Sissi. Según la nota prensa de la conseyería, el xuráu decidió por mayoría conceder el premiu al testu de Fernández "pola construcción d'un universu narrativu personal nel que se van esbillando acontecimientos, datos y situaciones sobre les que l'autor vuelve dende distintes perspectives a lo llargo de tola obra".  Amás de la novela de Xandru Fernández, presentáronse al premiu, dotáu con 7.000 euros, otros seis trabayos.
 
Xandru Fernández (Turón, 1970) ganara yá n'otres dos ocasiones el Xosefa Xovellanos coles obres 'El club de los Inocentes' (1993) y 'El suañu de los páxaros de sable' (1999). Amás, tien publicaes otros trés noveles: 'Los homes de bronce' (2001), '-yos ruines' (2004) y 'La banda sonora del paraísu' (2006). Coles mesmes publicó'l llibru de relatos 'Entierros de xente famosu' (2008) y tornó al asturianu 'La tresformación', de Franz Kafka, y 'Mario y el magu', de Thomas Mann.