Xaime Martínez lleva los sos cantares de ‘Ósculos d’agua nel Imperiu Asturianu’ a ‘Amosando’

La iniciativa ‘Amosando’, formatu de conciertu íntimu con públicu reducíu pa promocionar bandes asturianes per Internet, suma la so segunda entrega. Tres ‘L-R’ agora ye’l turnu de Xaime Martínez, col so trabayu ‘Ósculos d’agua nel Imperiu Asturianu’.

Los estudios de grabación de Javier Lueje nel barriu xixonés d’El Natahoyo foron el llugar escoyíu pa la grabación d’estes dos actuaciones, encargándose Goxe Producciones de la producción. Un espaciu pequeñu nel que los músicos pudieran ufrir a un públicu tamién pequeñu en númberu los cantares de les sos novedaes discográfiques en formatu acústicu creando un ambiente especial d’intimidá y cercanía.

El resultáu son dos conciertos únicos que Musicasturiana, organizadora de ‘Amosando’, difunde pela rede al traviés de les plataformes YouTube y Facebook cola intención de llevar la música tanto de L-R como de Xaime Martínez más allá de les nueses llendes. L’actuación del dúu formáu por Leticia Baselgas y Rubén Bada visualizáronla 8.000 persones dende la so espublización hai 3 meses.

Agora ye’l turnu del autor del esitosu ‘Ósculos d’agua nel Imperiu Asturianu’ –discu editáu por Araz, empresa editora tamién d’Asturies.com–, que se fixo acompañar de Jesús Colino al baxu y de Germán Álvarez Mingote a la batería, que yá participaren na grabación del álbum. Mientres casi 30 minutos de llargor, los trés músicos interpreten cantares como ‘Gausón, caudiellu ástur, mira’l mar dende’l so castiellu mentes siente aportar les tropes d’Augusto’, ‘Pelayo cánta-y una añada a Favila, tres atalantar el futuru aciagu que comporta’l cumplimientu del Imperiu’, ‘La Santina como centru del mundu, o aplicación de la vulcanoloxía d’Athanasius Kircher’ o 'Discursu de Belarmino Tomás énte los soldaos mentes camina sobre les agües del ríu Nalón', pa finar con una versión d’un tema n’inglés, la popular ‘Midnight Special’.