Xácara y Corquiéu actúen nel Arcu Atlánticu

|
Xácara y Corquiéu actúen nel Arcu Atlánticu

La banda de gaites uvieína lleva a la Plaza Mayor el so espectáculu 'Synexthesia'.

L'actividá musical nun apara nel Festival Arcu Atlánticu. Tres l'esperáu conciertu d'ayeri de Felpeyu pa celebrar los sos 25 años sobre los escenariu y la presentación del so discu 'Cerquina', que nun defraudó a los munchos siguidores y turistes que s'axuntaron na Plaza Mayor xixonesa, güei toca una cita dobla con Xácara y Corquiéu dende les 22 hores.

La banda gaites va trayer al certame'l so espectáculu 'Synexthesia', pal que van tar acompañaos pola Little Band del Conservatoriu Profesional de Música y Danza de Xixón. Esta propuesta de Xácara combina la música tradicional asturiana col jazz y el swing del sur de los Estaos Xuníos, fusionando gaites con metales.

Darréu, al rodiu les 23 hores, va xubir al escenariu Corquiéu, banda folk que cumple 20 años y que ta celebrándolo con una xira na que repasa so repertoriu. Los rioseyanos tán trabayando no que va ser el so cuartu discu, del que se va poder sentir un adelantu esta nueche.

Mañana, Dixebra

Mañana va ser el turnu d'otra banda que ta de celebración, Dixebra, nesti casu polos sos 30 años de trayeutoria, mentes que'l vienres el gaiteru Bras Rodrigo va presentar el so trabayu 'A pause in New York'. Pa poner el ramu a los conciertos de la Plaza Mayor, Herbamora y los gallegos Xabi Díaz y Adufeiras de Salitre van actuar el sábadu.

 

Contador Estadistiques