WWF/Adena pide protección pal mediu marítimu na contornada d'Avilés

La organización ecoloxista WWF/Adena, qu'estrenó va poco agrupación n'Asturies, presentó güei lo que valora como "una propuesta pionera" pa iguar una Rede Representativa d'Árees Marines Protexíes per tola costa española col oxetivu de caltener los ecosistemes de los paisaxes marinos de mas riqueza.

Pa facer esta rede, que quieren que resguarde mediuambientalmente lo menos el 10% de la costa española, WWF/Adena propón una llista de venti paisaxes a protexer, que suponen pa la organización "los llugares marinos somorguiaos más asombrosos, orixinales y de mayor biodiversidá".

Ente esos venti "paisaxes submarinos" WWF/Adena propón ún n'Asturies, que sedría'l "Cañón d'Avilés" una faza de la nuestra costa que diz que ye "importante pa especies de pequeños peláxicos, como l'anchoa y tamién p'aves marines y cetáceos.
La organización sorraya la importancia dientro d'esti llugar de la presencia del Cabu Peñe, qu'estrema l'agua frío del Atlánticu de lo más calecío del Golfu de Vizcaya y que ye un llugar "únicu" como refuxu de páxaros y recursos pesqueros.


38 espertos y investigadores del mediu marítimu collaboraron de manera desinteresada con WWF/Adena pa iguar esta propuesta, que se presenta acompañada d'una completa documentación y una cartografía d'ellaboración propio. La organización quier que la rede tea funcionando pal 2020.

WWF/Adena sorraya que, en tol estáu, namás existen anguaño dos parques nacionales marítimo-terrestres, 10 Reserves Marines de Pesca y sobre 38 árees costero-marítimes con algún dello de protección por parte de les alministraciones autonómiques. Pa la organización, ello nun ye abondo pa garantizar la biodiversidá nel mar.