WWF/ADENA llama l'atención sobre'l peligru de desaniciu del faisán montés

L'informe "Sostenibilidá n'España 2006" que presentó la organización WWF/Adena conseña como los hábitats del lince ibéricu, el visón y el faisán montés tán desapaeciendo adulces al empar que les poblaciones d'estes especies menguaron más d'un 50% entre los años 80 y 2005, llegando nel casu del faisán montés al 75% y al 90% nel del lince, del que namás queden sobre 200 exemplares.

Toes estas especies sufrieron persecución directa hasta mediaos del sieglu pasáu, el visón européu pol emplegu del so pelleyu, el lince por ser un predador que s'alimentaba d'otres especies d'interés pa la caza y el faisán, de gran espardimientu n'Asturies, por ser un troféu de caza . Esta perda provoca, entre otres consecuencies, que les poblaciones se dixebren y que surdan problemes xenéticos rellacionaos cola endogamia, según l'informe de WWF/Adena. Amás de la caza d'estos animales, la desapaición de los habitat en que viven ye otru de los peligros pa estes especies que tán nun intre decisivu que podría llevar al so desanicie.

Nel casu del faisán montés, specie emblemática n'Asturies, el cambéu climáticu y la falta d'arándanos, alimentu básicu de la especie, tan arrequexando a los animales a espacios cada vegada más pequeños y separtando les comunidaes, llegando a casos como'l del Parque de Los Picos d'Europa, onde nun hai más de 24 animales nel total del parque, los más d'ellos pa la parte de Llión, porque en Cantabria dase yá por escosada la especie. Los censos d'esti ave apurren tamién númberos críticos, con una población perbaxo de los 300 exemplares. La construcción d'infraestructures en forma d'estaciones d'esquí o carreteres suponen un ataque directu al so hábitat.