WWF pide que s'investigue la muerte d'un osu en Quirós

Un escursionista atopólu n'estáu avanzáu de descomposición cerca de Faedo.

World Wildlife Fund (WWF), conocida ONG internacional en defensa de la fauna montesa, pide al Gobierno qu'investigue de forma urxente y fonda la muerte d'esti exemplar d'osu pardu con toles garantíes científiques y llegales posibles. La organización denuncia que se trata del segundo cadabre d'esta especie qu'apaez nesa zona nos dos años últimos, onde esiste una amplia actividá furtiva, según el Fondo Asturiano para la Protección de Animales Salvajes (FAPAS), entidá que s'encargó de dar a conocer esti casu.

Asina, WWF unvió una carta a la Conseyería de Desenvolvimientu Rural y Recursos Naturales na que solicita que se faiga a la mayor brevedá posible la necropsia y los correspondientes análisis toxicolóxicos nun llaboratoriu de referencia y que se desendolque la oportuna investigación. Tamién que se-y remita los resultaos y que consideren a la organización como parte interesada nel espediente alministrativo correspondiente que s'anicie.

“Esiximos una investigación a fondu, con tolos medios necesarios incluyendo los meyores espertos veterinarios, pa esclariar la muerte d'esta xoya de la naturaleza ibérica”, afirma Juan Carlos del Olmo, secretariu xeneral de WWF nel Estáu.