WWF entama una plantación d’árboles autóctonos pa contribuyir a frenar el cambiu climáticu

El conceyu de Ḷḷena ye’l llugar escoyíu por WWF Asturies (ADENA) pa facer una plantación de más de 300 árboles autóctonos en collaboración con ciudadanos. L’oxetivu ye concienciar a la población pa lluchar contra’l cambiu climáticu.
 
Esta actividá del coleutivu conservacionista va celebrase’l sábadu, a les 10 hores, nuna parcela asitiada a 5,4 quilómetros de la desviación de Riosa (AS-231) dende La Pola Ḷḷena, que ta cedía pol Conceyu Ḷḷena, ayuntamientu que tamién collaboró col esbroce del prau, la escavación de fueyos en suelu pa celebrar l’actividá y la entrega de les plantes. “Dende WWF creemos que cada ún podemos reducir la nuesa buelga de carbonu, y una forma prestosa de facelo ye plantando árboles autóctonos. Animamos a tol mundu a participar y disfrutar d’una mañana plantando con nosotros”, esplica Esther Vallado, coordinadora del Grupu WWF Asturies, que señala qu’esta actividá ta abierta a persones de toles edaes al tar yá fechos los fueyos pa los árboles.
 
Esta aición, na que tamién collabora la Conseyería de Mediu Rural y Pesca, ta plantegada amás como una xornada de carauter llúdicu, informativu y de sensibilización. Asina, los voluntarios del grupu llocal de WWF van esplicar a los presentes "la importancia de la conservación de les viesques autóctones y la so influencia nel cambiu climáticu y na conservación de la biodiversidá".