Woody Allen, urbi et orbe

Falta una selmana pa que Woody Allen visite Asturies con motivu de la entrega de los Premios Príncipe d'Asturies, y tolos aficionaos al cine del americanu tan sollertes a ver si tienen dalguna ocasión pa velu de cerca y hasta poder tratalu si se tercia. La visita d'Allen ye un acontecimientu que trespasa la llende de lo que ye'l cine pa convertise nun actu social nel que muncha xente querrá allegase al célebre cineasta como quien va a ver una reliquia d'un santu. Nesti sentíu, quiciás l'actu más esperáu ye'l coloquiu que va facer Allen el día 24 nel Teatru Xovellanos de Xixón, onde se proyectará "Manhattan" el día enantes de la entrega del Premiu Príncipe d'Asturies de les artes. Amás de facer cola pa conseguir una entrada, la cita con Allen, que va tresmitise pela rede, va poder seguise dende un carráu de webs asturianes: El web del Teatru Xovellanos, el de Telecable, el de la Fundación Príncipe d'Asturies y el del Ayuntamientu de Xixón van dar l'enllace cola cámara nel teatru. Quien quiera entrugá-y daqué cosa a Allen tamién tien un corréu electrónicu, anque con tolo que-y llegará, sedrá como mandar la carta a los reis magos.