Woody Allen estragó la rede

Asturies entero ta tomada pola entrega de los Premios Príncipe d'Asturies. Arriendes del interés informativu que tien l'actu d'esta tarde nel Teatru Campoamor d'Uviéu, con bien de medios destacaos, y del cortexu de seguridá puestu pa los premiaos y pal Príncipe, la rede asturiana nun pudo quedar fuera del barullu qu'arrodia los premios, too por culpa del más famosu de los premiaos. El director de cine Woody Allen, galardonáu col Premiu de les Artes, participó ayeri nun actu especial nel Teatru Xovellanos de Xixón, onde proyectaron Manhattan y Woody charró n'acabando la película col públicu qu'enllenó'l teatru. L'actu tresmitíase tamién pela rede al través de los webs de la Fundación Príncipe d'Asturies, Ayuntamientu de Xixón, Teatru Xovellanos y Telecable, empresa que s'encargó de poner los medios afechiscos pa poder facer la tresmisión. Ello ye que yá primero de qu'entamare la tresmisión, bien d'internautes clientes del serviciu de Telecable decatáronse de que la rede diba abondo despacio. Les páxines tardaben en cargar y baxar el corréu yera misión imposible. En terminando l'audiencia pública del director americanu, el serviciu de la empresa de telecomunicaciones recuperose dafechu. ¿misterios de la rede?