Wert pretende blindar l’enseñu de la llingua castellana na so propuesta nueva de reforma educativa

|

El ministru Wert presentó esti martes a les autonomíes un borrador nuevu de la Llei de Meyora de Calidá Educativa que quier impulsar. Ésta pretende blindar l’enseñu del castellanu y dexa nuna situación entá más complicada a l’asturianu.

El testu va esixir a les autonomíes el pagu d'una plaza nun centru priváu a aquellos padres que soliciten la educación en castellanu cuando esta comunidá nun pueda ofrecer esta posibilidá nun centru públicu o alcordáu, siempre y cuando nun s'estableciera una "proporción razonable" de dambes llingües. Amás, la versión nueva del anteproyeutu recueye, na disposición adicional ‘llingua castellana y llingua vehicular de la enseñanza’, que "les alministraciones educatives van garantizar el derechu de los alumnos a recibir les enseñances en castellán, llingua vehicular de la enseñanza". Establez que la llingua castellana y la so lliteratura van tener el tratamientu necesariu pa que tolos alumnos la entiendan y s'espresen nella con correición, de forma oral y per escrito, al rematar la enseñanza básica.

Coles mesmes, señala que los territorios que tengan otra llingua oficial xunto al castellanu, acordies colos sos estatutos, les alministraciones educatives tendrán que garantizar en toles etapes educatives obligatories qu'eses llingües cooficiales s'ofrezan nes distintes materies en "proporciones equilibraes nel númberu d'hores llectives", de manera que se procure'l dominiu de dambes llingües oficiales polos alumnos, ensin perxuiciu de la posibilidá d'incluyir llingües estranxeres. Amás, añade que correspuende a estes alministraciones determinar la proporción que proceda nel usu del castellanu y l’idioma cooficial como llingües vehiculares nel sistema educativu, n'atención al estáu de normalización llingüística. D’igual forma, especifica que van poder otorgar, en función  del estáu de normalización llingüística nos sos territorios, un tratu diferente a la llingua cooficial sobre'l castellanu "nuna proporción razonable", sin qu'en nengún casu pueda suponer de fechu la esclusión del idioma castellanu.

“Mientres nun se realice la determinación a que se refier el párrafu anterior, los padres o tutores van tener derechu a escoyer la llingua vehicular de la enseñanza que reciban los sos fíos. Cuando, de resultes de dicha falta de determinación, nun esista ufierta docente pública o acordada na llingua vehicular escoyida na población de residencia de los alumnos, los padres o tutores van poder optar por escolarizar a los sos fíos en centros privaos, correspondiendo a l'alministración educativa sufragar los gastos d'escolarización", añade la disposición. El testu establez amás como asignatura troncal el castellanu y la lliteratura nesti idioma, mientres que les llingües cooficiales pasen a ser materia d'especialidá, que tendrán que cursar obligatoriamente los alumnos nes comunidaes onde se falen. Nel casu del asturianu y gallego-asturiano, al nun tener la categoría d’oficial, nun sería llingua vehicular como’l castellanu, l’inglés y un segundu idioma estranxeru, pasando a tar per detrás de toes estes materies.

Otra manera, la materia d'Educación pa la Ciudadanía va desapaecer, mentes que va incluyise una alternativa obligatoria a l'asignatura de Relixón en Primaria y la ESO. Asina, los alumnos de Primaria tendrán qu'optar ente Relixón o la so alternativa, denominada 'Valores Sociales o Culturales', a eleición de los padres o tutores. Na ESO tamién va ser obligatorio cursar o bien Relixón o bien Valores Éticos, dientro de les materies específiques.

 

Contador Estadistiques