Vuelve la marea prieta

La borrasca que ta estos díes mandándonos la ñeve tamién ta echando pa contra la costa los resclavos de la marea negra del Prestige col vientu nordés que va con ella. Énte esta situación, protección civil ta organizando retenes pa esti fin de selmana, y, gracies al trabayu d'asociaciones civiles tamién van salir autocares de voluntarios dende les ciudaes más importantes del país. Onde nun dan abastu col llabor nin tienen xente voluntario ye nel centru de recuperación de páxaros de San Xuan de Nieva, n'Avilés. El mal tiempu ta azontando a una población yá mui dañada pola marea prieta, y estos díes tuvieron entrando más páxaros engalipotiaos, llegando a ingresar 70 páxaros el sábadu día 4. Anque'l ritmu baxó un poco los primeros díes de la selmana, ayeri diose otra entrada fuerte. En San Xuan de Nieva recueyen los páxaros enfermos y tamién los muertos pa facer el recuentu de la catástrofe. Nesti sentíu, ayeri entraron más de 50 páxaros muertos, que dicen que tenín señales evidentes de tener el fégadu comíu pol galipote que tragaren. Énte esta situación, el centru fai un llamáu d'urxencia a quien pueda dir a andechar nel llabor de llimpieza de les aves, llamando nesti casu al coordinador del centru, Alberto Vizcaino, al númberu 985 10 59 57.