Vuelve la llinia Soto-Penagos

Depués de diez años p'atrás y p'alantre, la llínia d'alta tensión Soto -Penagos, que tendría de valir pa sacar pa la parte de Cantabria l'escedente de corriente que se produz n'Asturies, vuelve otra vegada a l'actualidá. La prioridá d'esta infraestructura yá venía anunciada nel alcuerdu programáticu ente FSA-PSOE y IX-BPA, y l'executivu asturianu demostró bien luego que tien priesa por sacala alantre. De fechu, el compromisu cola Soto-Penagos, convertida en "autopista cantábrica de la ellectricidá" foi la conclusión más importante del cume interautonómicu ente Asturies y Cantabria de va quince díes.

Sicasi, la llinia d'alta tensión sigue dando en duru nos mesmos sitios en que dio siempres: el movimientu vecinal de los llugares per onde pasa y la oposición dafechu del movimientu ecoloxista. Esta selmana, y énte l'apaición nel BOE de la "Memoria Resumen del Impactu Ambiental" de la llinia, lo que provoca l'entamu d'un periodu nuevu d'alegaciones, los vecinos de Carbayín (Siero) que tan preparando un nuevu testu d'alegaciones, y la Coordinadora Ecoloxista Asturiana, que yá lu presentó, foron los primeros en reaccionar. Los ecoloxistes

denuncien defectos graves na memoria, sorrayando que les modificaciones que se fixeron nel proyectu sobre'l trazáu orixinal de la llinia nun vinieron acompañaes d'estudiu d'impactu ambiental, como mandaba una sentencia del Tribunal Supremu del 2002.

La coordinadora llama l'atención sobre'l peligru pa la salú de les llinies d'alta tensión y entiende que nun pue tolerase la esistencia de viviendes a menos de 100 mts, cuando tendría d'haber una llinia de seguridá de lo menos 40. Otramiente, les alegaciones de los ecoloxistes espeyen delles ausencies nel testu de la memoria'l que la memoria nun fale de riesgos como'l de cayida de rayos, riesgu de quema por descarga o impactu visual. Enforma grave-yos abulta a los ecoloxistes que la memoria nun gaste una palabra pa falar del pasu de la llinia per Carbayin, el tramu más grande que queda por facer de la llinia. pa rematar, la coordinadora denuncia que nun se sabe que va pasar coles dos llinies de 220kv que cubren agora'l serviciu de la futura Soto-penagos