Vuelve a subir el paru n’Asturies. N’ochobre 2.138 persones más

El númberu de paraos n'Asturies subió en 2.138 persones n'ochobre, lo que supón un aumentu del 2,81 por cientu sobre'l mes anterior, y asitió'l númberu de paraos en 78.140, d'acordies colos datos publicaos pol Ministeriu de Trabayu.

No qu'afecta al paru masculín, ésti asitióse n'Asturies en 36.452 persones, mientres que'l femenín algamó un total de 41.688 persones.
  
Por sectores, el paru subió en Servicios en 1.622 persones; siguíu del sector Industrial, con 399 persones; el colectivu de persones sin empléu anterior con 146 paraos y Agricultura con 35 persones, mientres que baxó en Construcción, con 64 paraos menos.
  
Por tramu d'edá rexístrense 8.624 persones inscrites nel Inem que son menores de 25 años.
  
En cuanto al paru rexistráu nos estranxeros n'Asturies mientres el mes d'ochobre asitióse en 5.560 persones, lo que supón una subida de 282 persones al respecto de setiembre.
  
Mentanto, el númberu total de contratos nel Principáu aumentó n'ochobre en relación al mes anterior en 385 (+1,53%), asitiándose en 25.628 contratos totales. Nel total del Estáu, la la contratación baxó un 3,18 por cientu.
 
Crítiques del BA
Al traviés d’una nota de prensa, el Bloque por Asturies calificó de “sangría” el fechu de que’l paru volviera a medrar. Los nacionalistes afimaron que la cifra de 78.140 paraos n’Asturies ye una “demostración palpable de la incapacidá y la incompetencia del Gobiernu del Principáu” pa poner fin al desempléu.

“La única ocurrencia que tien ye despidir trabayadores interinos y eventuales al traviés de la so política de recortes permanentes”, criticó’l Bloque mientres sorrayaba que’l incrementu del paru nun 2’81% n’Asturies ye la cifra más alta del Estáu.

Con vistes a poner soluciones, la formación asturianista insitió en que “os Presupuestos d’Asturies 2011 deben convertise “nuna respuesta contundente ante la crisis, el paru y l’emprobecimientu”, amás de reactivar económicamente’l país, desarrollar polítiques sociales y fortalecer la inversión pública.