Vueling va caltener la conexón con París na temporada d’iviernu

La compañía de baxu coste Vueling va mantener la ruta Asturies-París na temporada d’iviernu. D’esta forma, el país caltién la conexón permanente que se perdió tres la marcha d’Air France, anque agora nel secundariu Paris-Orly.

Tres esta anuncia, Vueling consolídase nel Aeropuertu d’Asturies con un aumentu del 36 por cientu de places disponibles, pasando de 114.000 nel 2011 a más de 155.000 nesti 2012. Esta medra débese tanto a un aumentu de frecuencies de la conexón con Barcelona, que pasa de 14 selmanales a 19 y más de 140.000 asientos a la venta como, sobre manera, al caltenimientu de la ruta, hasta agora esclusiva de branu, Asturies-París con más de 15.000 asientos disponibles. La compañía punxo yá a la venta les places de la temporada d’iviernu (28 d’ochobre-24 de marzu) con precios por trayeutu, con tases incluyíes, dende 34,99 euros pa la ruta a la capital francesa y 24,99 euros pa la catalana. Amás, dende estos dos aeropuertos, los usuarios asturianos van poder coneutar con otru mediu centenar de destinos a los que vuela la compañía con base n’El Prat de Llobregat.

Gracies a la permanencia de Vueling en Santiagu’l Monte, Asturies recupera la conexón con París a lo llargo de tol añu. La marcha d’Air France perxudicó enforma a los pasaxeros asturianos, qu’utilizaben la ruta Asturies-París pa coneutar con otros vuelos, n’especial de llargu percorríu. Empresarios del país yeren los usuarios principales d’estos vuelos, anque munchos turistes tamién utilizaben esta vía pa viaxes a América y Asia. La diferencia ente la conexón qu’ufría la compañía francesa y Vueling ye que la primera xunía l’aeropuertu asturianu col principal de la ciudá, el Charles de Gaulle, mentes que la compañía catalana coneuta col Paris-Orly que, sicasí, ye’l segundu más importante del Estáu.