VTP edita un estudiu sobre’l diañu burllón d’Alberto Álvarez Peña

La editorial VTP asoleyó estos díes el llibru "El Diañu Burllón" obra del investigador en cuestiones d'etnografía y mitoloxía Alberto Álvarez Peña. La obra fai estoyu de tolos personaxes y mitos que s'escuenden tres del nome del Diañu Burllón. Xenios de los montes y los llugares y creencies funeraries de los astures prerromanos de la Edá del Fierru son los oríxenes que se resumen na figura del Diañu Burllón nun tracamundiu de personaxes qu'al paecer del autor diose nes mitoloxíes de tola Europa occidental, porque'l cristianismu aprovechó aquellos mitos pa da-yos un calter moralizante.

El diañu Burllón ye ún de los seres más característicos del panteón de la mitoloxía asturiana. Rellacionáu sobremanera cola naturaleza y cola actividá humana na mesma, el Diañu Burllón ye un ser qu'exemplifica en cierta midida'l mieu a la naturaleza, y qu'engaña a les persones, faciéndoles sentir o ver coses que nun esisten, mientres qu'otres apaez baxo l'apariencia falsa d'un animal o d'una persona pa confundir a la víctima de les sos trastaes.