“VOX ta en contra de la cooficialidá y del usu de la llingua”, aseguró Álvarez Rouco

La conceyala de Festexos en Xixón fixo esta afirmación llueu de manifestar que "VOX ta a favor de les tradiciones; VOX ta a favor de los diferentes bables y el so usu en llibertá".

"Nos díes pasaos tracamundióse'l nuesu posicionamientu sobre l’utilización del asturianu nes futures actuaciones de festexos de la nuesa ciudá, y la intención con esta comparecencia ye matizalo y esclariar", arrancó la so intervención na sala de prensa de la Casa Conceyu la edil de VOX, Sara Concepción Álvarez Rouco. "Recordaréis vustedes qu’en VOX Xixón repetimos en campaña hasta l'enfastiu que nos identificamos dafechu cola defensa de la nuesa cultura y les nueses tradiciones, que tamos poles costumes llocales y que respetamos absolutamente tolo rellacionao cola identidá d’Asturies. Y que frente lo que se diga en campañes interesaes como ésta que güei nos ocupa, somos los grandes defensores de los derechos y llibertaes de les persones frente a les restricciones y prohibiciones que tanto-yos gusta a les izquierdes", apuntó.

D'igual forma, quixo dexar "mui claro que nun tamos pola imposición de la llingua que se pretende dende estes izquierdes. El que diga a estes altures nun enterase que nel programa de VOX nun ta apoyar la oficialidá de la llingua ye que nun ta al día de lo que vien ocurriendo na realidá política asturiana o qu’actúa con posturéu". "VOX ta a favor de les tradiciones; VOX ta a favor de los diferentes bables y el so usu en llibertá. VOX ta en contra de la cooficialidá y VOX ta en contra del usu de la llingua", siguió.

"Referímonos al usu del asturianu nos espectáculos públicos tal y cómo fiximo porque ye fundamental evitar que se confunda la tradición asturiana cola oficialidá del asturianu. La nuesa postura nun ye una provocación, sinón un exerciciu de coherencia qu’a naide nun-y pue sorprender", momentu nel qu'aseguró que "ye inalmisible que se nos atribuya declaraciones que nun fiximos. Nuna entrevista pa Onda Cero que toos conocen, a la entruga de si vamos programar actuaciones d’artistes asturianos que falen n’asturianu en Xixón diximos, lliteralmente, 'si se puede, non, pero nunca se sabe'", argumentó.

"Nunca vetamos a nengún artista n’asturianu y n’alusión a la llegalidá, diximos los siguiente: “si se pue, non, pero nunca se sabe”, insistió citando informaciones y artículos asoleyaos en prensa asina como a un comunicáu de l'Academia de la Llingua Asturiana "na que torna a facese referencia a la entrevista radiofónica n’Onda Cero utilizando solamente una parte de 'si se pue, non', pero debería por supuesto incluyir tamién 'nunca se sabe'. Y en too casu nun significa nengún vetu, nenguna censura nin por supuesto nenguna prohibición", rescampló Álvarez Rouco tratando de facer malabares llingüísticos.

Sitiu pa lo tradicional

"Partiendo d’un supuestu erroneu, llegóse a una serie de noticia que nun s’axusten a la realidá y promueven por supuesto’l sensacionalismu. Les interpretaciones chambones siempre tán de más provengan d’onde provengan porque, como repetimos, VOX nun vien a poner too pates arriba, sinón que los espectáculos en Xixón ameyoren. Trabayaremos por Xixón y polos xixoneses", declaró enantes de concluyir que "pa que quede suficientemente claro y fine esta polémica, nos festexos xixoneses tendrá sitiu tolo tradicional como vieno siendo hasta la fecha, porque lo que se pretenderá ye facer una programación amplia, variada y que satisfaga a los xixoneses. Tolo que se diga en contra d’esto ye y será una manipulación y tará por supuesto de más".

Y insistió, enantes d'atender les entrugues de los periodistes, yá fuera de guión, "pa que quede absolutamente claro lo que queremos: lo que nun queremos ye tocar el conflictu de que se confunda la oficialidá colos espectáculos n’asturianu, porque si la promoción del espectáculu n’asturianu va ser una plataforma d’apoyu a la oficialidá de la llingua, nós nun vamos apoyalo. Nun tien nada que ver cola cultura nin coles tradiciones d’Asturies, que ye colo que ta d’alcuerdu VOX".

Nesta información pue consultar la ronda de preguntes de la prensa.

Na semeya, los dos ediles de VOX en Xixón, Álvarez Rouco y Óliver Suárez Rubio, que va presidir Divertia.