VOX perdería’l so diputáu por Asturies, que diría pal PSOE o Foro según el CIS

La estimación de votu del macrobarómetru preeleutoral d’ochobre del Centru d’Investigaciones Sociolóxiques (CIS) quita a VOX el so diputáu por Asturies, que diría pal PSOE o Foro. Los socialistes ganaríen les eleiciones estatales, anque nun tendríen la mayoría y deberíen pautar con Xuníes Podemos o Ciudadanos.

Asturies tien dende esti añu una representación de 7 diputaos nel Congresu, qu’en mayu repartiéronse ente’l PSOE (3), PP (1), Xuníes Podemos (1), Ciudadanos (1) y VOX (1). Según l’estudiu del CIS, José María Figaredo perdería’l so escañu, que pasaría al PSOE o a Foro, qu’ocupa’l númberu dos de la llista na so coalición col PP con Isidro Manuel Martínez Oblanca como candidatu de la formación asturiana.

A nivel estatal, el PSOE algamaría ente 133 y 150 escaños, con una 32,2 por cientu d’estimación de votu, cifra lloñe de los 176 que suponen mayoría absoluta nel Congresu. Poro, anque aumentaría la cantidá actual de 122 diputaos, repetiríase la situación que llevó a la repetición d’eleiciones y necesitaría buscar pautos con otres formaciones.

Los sos socios posibles son Xuníes Podemos y les sos confluencies (14,6 por cientu), que sumaríen ente 37 y 45 (anguaño tienen 42) y Ciudadanos (10,6 por cientu), con ente 27 y 35 (57). El PP siguiría siendo la segunda fuercia, con un 18,1 por cientu d’estimación de votu y ente 74 y 81 representantes (66).

Entra CUP y Más País

Tamién algamaríen representación VOX, con un 7,9 por cientu (14-21; anguaño, 24); ERC (16-18; 15); Junts per Catalunya (4-6; 7); EAJ-PNV (6-7; 6); EH Bildu (5; 4); Coalición Canaria-Nueva Canarias (1-2; 2); Navarra Suma (2; 2); y PRC (0-1; 1). Entraríen nel Congresu na so primer participación nunes estatales Más País (2 y 1 de la so coalición valenciana Més Compromís-Más País) y CUP (1-2).

Na semeya, Adriana Lastra, candidata al Congresu del PSOE por Asturies, nel actu celebráu ayeri nel Recintu Ferial Luis Adaro de Xixón.