“Vivimos un retrocesu por cuenta la hipersensibilidá de la xente; nun ye tiempu pa la parodia”, asegura David Artime

‘Cróniques d’un machista feminazi’ (Hoja de Lata) ye la tercer novela de David Artime, un llibru “pa riise” que ye tamién “una crítica social” que presenta esti vienres en casa, en Candás. Sicasí, la esposición de la realidá social que fai’l periodista y escritor nesta historia paez nun prestar a tol mundu: “Vivimos un retrocesu por cuenta la hipersensibilidá de la xente; nun ye tiempu pa la parodia”, llamenta.

“Ye la historia d’una rapaz comprometíu, aliáu de les muyeres, progresista y periodista, que ve a la moza de 8 años cortexando con otros, lo que-y cambia la perspeutiva que tien de la vida, entamando a tener comportamientos gafientos. Finalmente llega a la conclusión de que la culpa de lo que-y asocede ye del machismu, que les muyeres tán alianes pol machismu, y entama un movimientu p’acabar con ello”, resume Artime la trama principal d’una obra que “tien partes dramátiques, un tonu humorísticu satíricu y un llinguaxe bastante groseru, que reflexa les conversaciones típiques ente paisanos sobre muyeres, inclusive desagradable”.

Una novela “pa riise” que ye “una crítica social” y afonda en “cómo afeuten los cánones machistes a los propios paisanos que nun se comporten asina”. “Ye un pensamientu que compartimos munchos sobre dalgo que se da, sobre manera na adolescencia. Siempre’l nomáu ‘machu alfa’ tuvo ésitu ente les muyeres y los que respeten y nun cosifiquen a la muyer lligaron menos”, rellata Artime, que califica la so historia de “mui paródica y caricaturesca”.

Sicasí, considera que nun tol mundu paez entender esti tonu. “Cuando publiqué los otros llibros recibí pronto mensaxes positivos que con ésti nun lleguen. Vivimos un retrocesu por cuenta la hipersensibilidá de la xente; nun ye tiempu pa la parodia”, reflexona.

Y ye que ‘Cróniques d’un machista feminazi”, qu’Artime presenta esta tarde a les 20 hores nel Centru Polivalente La Baragaña, critica los comportamientos machistes, pero tamién aquellos aspeutos del feminismu “más de posturéu, que, sicasí, nun cambien el so sentíu". Coses qu'a munchos homes y a munches muyeres nun-yos presta sentir, o nesti casu lleer.

Na semeya, Artime xunto col actor Alberto Rodríguez na presentación del llibru celebrada la selmana pasada na llibrería xixonesa La Buena Letra.