Virgili quier que la Xunta Xeneral afite'l porcentaxe d'emisión en RTPA

"Ye refugar responsabilidaes", diz Xosé Antón González Riaño. La XDLA y Iniciativa pol Asturianu reaicionen énte la posición amosada pol direutor xeneral de la RTPA.

Antonio Virgili treslladó a los partíos políticos na Comisión de Siguimientu de la RTPA que sía la Xunta Xeneral la qu'afite'l porcentaxe d'emisión en llingua asturiana nel ente públicu de comunicación. Fíxolo tres les crítiques de los representantes de Podemos y Izquierda Xunida (IX) pola escasa presencia del asturianu na TPA y na RPA, que la Xunta pola Defensa de la Llingua Asturiana (XDLA) cuantifica en menos de cinco hores a la selmana na televisión y de diez minutos de llunes a vienres na radio.

Asina, señaló que la progamación pa unos "yera escesiva" y pa otros "curtia", polo qu'él trata de buscar "el permedio". La solución propuesta pol direutor xeneral ye se faiga al traviés d'un mandatu-marcu y el so desarrollu posterior nun contratu-programa por parte de la Xunta Xeneral.

Cumplir cola normativa

La postura de Virgili foi criticada por González Riaño, que señaló que "ye refugar responsabilidaes". El presidente de l'Academia de la Llingua Asturiana (ALLA) afala al direutor xeneral del ente a cumplir cola Llei d'Usu y Promoción del Bable/Asturiano, l'Estatutu d'Autonomía y la Llei de Segunda Reestructuración del Sector Públicu Autonómicu, qu'afiten al canal públicu como "un elementu dinamizador" de la llingua asturiana.

"Nun ye responsabilidá del Parllamentu facer la programación", añade'l profesor universitariu, que considera que Virgili "sabe lo que tien que facer. Nun pue escudase en qu'unos quieren más y otros menos". 

Respuesta de los coleutivos de defensa del idioma

La XDLA solicitó al direutor xeneral qu'esplique "pa quién ye escesiva la programación n'asturianu qu'actualmente s'emite en RTPA" y recuerda-y que lo que marca la llei "ye que la cadena tien que ser una parte activa nel procesu de promoción de la llingua asturiana, polo qu'equí nun val lo que puedan opinar unos o otros: RTPA tien que cumplir cola llexislación vixente". De la mesma manera, refuga la posición que mostraron Foro y Ciudadanos nes comparecencies de los miembros nuevos del conseyu d'alministración –amosáronse a favor de que la canal cumpliera cola llei–, dalgo que criticaron tanto la diputada Carmen Fernández como Diana Sánchez, porque “l'asturianu nun ye oficial”.

Iniciativa pol Asturianu, pela so parte, animó, "ensin dexar de llau la responsabilidá del director de la RTPA na escasa ufierta de programación n’asturianu de la canal", a "los verdaderos responsables últimos, los partíos de la Xunta Xeneral", a "que tomen decisiones y faigan porque la RTPA tenga infraestructura y medios pa usar de forma más intensa l’asturianu". Asina propón que se cree "una dirección específica de conteníos n'asturianu na RTPA, que curie porque la presencia del asturianu vaya medrando de forma tresversal y digna en tolos ámbitos del ente, tanto nos programes d'entretenimientu como nos informativos, cine, programación infantil, deportes y otros formatos".