Villaviciosa aprueba'l software llibre

La selmana pasada, Villaviciosa convirtiose nel primer conceyu asturianu en dar un pasu alantre nel asuntu del software llibre aplicáu a l'alministración.

Les alministraciones públiques y los conceyos asturianos trabayen esclusivamente con software propietariu que-yos sal abondo caro. Por poner un casu, el Principáu pagó-y l'añu pasáu 1.267.868 euros a Compaq España en conceptu de llicencies de Microsoft pa que l'alministración pudiera siguir usando los productos del xigante de la informática. Énte esta sangría económica, bien d'alministraciones públiques n'Europa tan faciendo esfuerzos por pasase al campu del software non propietariu, que-yos val p'aforrar bien de perres. Esti ye'l camín pol que decidieron metese va poco l'alministración portuguesa o la Xunta d'Extremadura son los dos casos más cercanos que tenemos d'organismos públicos que yá tan entrando pel software llibre.

La otra selmana n'Asturies diose'l primer pasu nesti camín cuando'l conceyu de Villaviciosa aprobó, colos votos al favor de PP, PSOE y de l'asturianista independiente Mundo Collada una moción pa que'l conceyu aceptare'l dir enxertando'l software non propietariu na so alministración. Anque la moción la defendiere Mundo Collada, el testu de la mesma presentolu Izquierda Asturiana, que diz que va presentar mociones asemeyaes en más conceyos asturianos dientro d'una campaña al favor de los programes non propietarios.

La propuesta conxunta de Mundo Collada y IAS votose al acabu d'un plenu abondo tensu por dos temes qu'enraxonaron a los conceyales y al abondante públicu presente. El discutiniu pola reapertura de la piscina municipal y la petición de retirada de la placa n'honor a Franco que cuelga de la parede de la casa consistorial, que refugó la mayoría del PP engafentaron l'ambiente, asina que foi una sorpresa que pa la votación de la moción sobre software llibre toos se punxeren d'alcuerdu y que'l testu presentáu por IAS se diere de pasu namás que cola abstención del conceyal de la URAS, que dixo nun saber que votar por desconocimientu del tema.

Contador Estadistiques