Villaviciosa acueye un nuevu taller d'asturianu
|
28 Avientu, 2017 por Redacción
- Inicie sesión o rexístrese pa espublizar comentarios
El plazu pa matriculase fina'l día 17.
El Serviciu de Normalización Llingüística de la 'Comarca de la Sidra', en collaboración col Atenéu Obreru de Villaviciosa, entama un nuevu taller d'asturianu, con clases que van comenzar el mesmu día 17 y que van allargase hasta'l 21 marzu, completando un total de 30 hores. En concreto, éstes van desendolcase tolos miércoles nel propiu Atenéu de 18 a 20.30 hores.
El taller ta empobináu a toda persona interesada n’ampliar los sos conocimientos sobre la llingua asturiana independientemente del so nivel y va atender tanto pa la estaya oral como pa la escrita. Asina, les sesiones van tar dividíes en dos partes, tando la primera dedicada a la espresión escrita, partiendo de les producciones del alumnáu pa correxir y repasar les normes ortográfiques y gramaticales, amás d’ampliar los recursos sintácticos y de vocabulariu.
La parte oral, mentes, fadrá por quitar mieos a la hora d’intentar enfrentase n’asturianu a les situaciones comunicatives más diverses, corrixendo errores y buscando un modelu natural y prestosu de llingua falada. Nel taller va ponese atención, igualmente, a les producciones culturales actuales en llingua asturiana, asina como tolos elementos sociollingüísticos que condicionen el so desarrollu y evolución, historicamente y na actualidá.
La xente interesao en matriculase nel taller pueden informase o apuntase nos correos electrónicos normastur@lacomarcadelasidra.
Efrén d'Andrés
