Villamanín va acoyer un campamentu de branu n’asturianu pa neñes y neños de 6 a 16 años

Abruja Ocio entama esti branu un campamentu en Villamanín nel que l’asturianu va ser la llingua vehicular de toles actividaes. Ésti ta destináu a neñes y neños de 6 a 16 años y va tener como sede l’Albergue La Casona Amarilla, antigua residencia xuvenil d’Hunosa na población lleonesa de Villamanín.

La fecha escoyida pa esta primer edición del campamentu, nel que collabora Iniciativa pol Asturianu y Alderiques d’Asturies, ente otros, ye del 8 al 15 de xunetu, con un preciu de 240 euros por persona, que sería de 210 euros pa un segundu hermanu. Los asitentes van poder conocer la historia d’Asturies y participar en talleres, velaes nocherniegues y xuegos tradicionales, siempre n’asturianu, amás de disfrutar d’una piscina.

La xente interesao nesta actividá novedosa pa la reciella pue algamar más información nos númberos de teléfonu 647.583.859 y 622.044.703, o al traviés del corréu electrónicu abruja@abrujaocio.com.