Villa amiesta comedia y drama en ‘Tres beyuscos’

Tres la bona acoyida de ‘A estaya’, la so primer novela destinada a un públicu adultu, Sidoro Villa Costales espubliza agora ‘Tres beyuscos’. Trátase d’una histora na que l’autor de Lieres afonda na so personal mestura ente comedia y drama, rescamplando l’humor prieto.

“Nun falta’l simbólicu atropellu d’un ser inocente –a manes del discutible progresu ferroviariu astur– y el maxistral remate marcáu pola presencia dominante de la naturaleza, nesti casu los beyos y cambriales del conceyu de Ponga”, espliquen dende la editorial, Impronta. En resume, ‘Tres beyuscos’ ye “una emocionante novela d’amor, protagonizada por unos cuantos perdedores, nel contestu d’una Asturies onde namás la mesma naturaleza va ser quien a devolver l’orde verdaderu a les persones y a les coses”.

Na obra destaca tamién “la naturalidá del rexistru llingüísticu, marca de la casa de Sidoro Villa, que fai que domine tamién como naide los retratos de calteres, les descripciones y los diálogos”, añaden. El de Lieres confírmase asina como un destacáu novelista de lliteratura p’adultos tres trunfar cola so producción pa neños y mozos.

Presentación en La Pola Siero

El profesor de Primaria, ilustrador y escritor va presentar ‘Tres beyuscos’ mañana, a les 20 hores, na sala de cámara del Auditoriu de La Pola Siero. Nel actu, amás de Villa, va tar presente el conocido montañero J.M. Piniella Iglesias, que proyeutará semeyes sobre la xeografía y los llugares de Los Beyos, territoriu míticu y paraísu suañáu polos dos protagonistes de la novela.