Villa afirma nel xulgáu que nun quedó con perres del SOMA

El sindicalista recibió insultos como 'lladrón' de los presentes al entrar a declarar ayudáu pola so muyer y la so abogada.

José Ángel Fernández Villa nun pudo evitar la so declaración énte la xueza, pa lo qu'argumentó hasta n'once ocasiones problemes de salú, y finalmente acudió esta mañana al xulgáu d'Instrucción númberu 2 d'Uviéu pa comparecer pol acusamientu d'apropación indebida del dineru del sindicatu SOMA-FITAG-UXT, del que foi secretariu xeneral per 34 años (1979-2013). La central reclama-y 420.000 euros.

A respuesta namái de les entrugues de la so abogada, Villa aseguró que nun garró nenguna perra del sindicatu y negó que les firmes de los cheques y tresferencies foren suyes, polo que fixo una prueba d'escritura pa comparar la so lletra cola de los documentos investigaos. Mentes, no que respeuta a los gastos de puros, colonies y flores, xustificólos apuntando que se trata de temes de protocolu sindical coles autoridaes.